نئی دہلی: سپریم کورٹ نے جمعہ کے روز دہلی ہائی کورٹ کے اس فیصلے پر عبوری روک لگا دی، جس میں نیشنل اسٹاک ایکسچینج آف انڈیا (NSE) کو حقِ اطلاعات (آر ٹی آئی) قانون کے تحت "عوامی ادارہ" (Public Authority) قرار دیا گیا تھا۔ جسٹس وکرم ناتھ اور جسٹس سندیپ مہتا پر مشتمل بنچ نے این ایس ای کی عرضی پر سماعت کرنے پر رضامندی ظاہر کرتے ہوئے مرکزی اطلاعاتی کمیشن (CIC) اور دیگر فریقین سے جواب طلب کیا۔

عدالت نے اس معاملے کی آئندہ سماعت چار ہفتے بعد مقرر کی ہے۔ این ایس ای نے دہلی ہائی کورٹ کی ڈویژن بنچ کے یکم جولائی کے فیصلے کو سپریم کورٹ میں چیلنج کیا ہے۔ اس سے قبل دہلی ہائی کورٹ کی ڈویژن بنچ نے این ایس ای کی اس اپیل کو مسترد کر دیا تھا، جس میں اپریل 2010 کے سنگل جج کے فیصلے کو چیلنج کیا گیا تھا۔

سنگل جج نے اپنے فیصلے میں کہا تھا کہ آر ٹی آئی ایکٹ کی دفعہ 2(ایچ) کے تحت این ایس ای "عوامی ادارہ" کے زمرے میں آتا ہے۔ آر ٹی آئی قانون کے تحت شہری صرف عوامی اداروں سے ہی معلومات حاصل کرنے کا حق رکھتے ہیں۔ ہائی کورٹ کی ڈویژن بنچ نے اپنے فیصلے میں کہا تھا کہ اگر کوئی ادارہ حکومت کی ملکیت میں ہو، حکومت کے کنٹرول میں ہو یا اسے حکومت کی جانب سے خاطر خواہ مالی معاونت حاصل ہو، تو اسے عوامی ادارہ تصور کیا جائے گا۔

عدالت نے کہا تھا کہ سنگل جج نے اپنے فیصلے میں این ایس ای کو حکومت کے کنٹرول میں قرار دیا تھا اور ڈویژن بنچ بھی اس نتیجے سے متفق ہے۔ این ایس ای نے مرکزی اطلاعاتی کمشنر کے حکم کو چیلنج کرتے ہوئے مؤقف اختیار کیا تھا کہ وہ آر ٹی آئی قانون کے تحت عوامی ادارہ نہیں ہے۔