نئی دہلی :سپریم کورٹ نے جمعہ کو ان عرضیوں پر مرکز سے جواب طلب کیا جن میں ڈیجیٹل پرسنل ڈیٹا پروٹیکشن ایکٹ کے ذریعے حق اطلاعات (آر ٹی آئی) قانون میں کی گئی ترامیم کو چیلنج کیا گیا ہے۔

چیف جسٹس سوریہ کانت، جسٹس جوی مالیا باگچی اور جسٹس وی موہنا پر مشتمل بنچ نے سینئر وکیل ورندا گروور اور وکیل پرشانت بھوشن کے دلائل سننے کے بعد مرکز کی جانب سے پیش ہوئے سالیسٹر جنرل تشار مہتا سے حکومت کا جواب داخل کرنے کو کہا۔

عرضیوں میں کہا گیا ہے کہ ان ترامیم سے شفافیت کمزور ہوئی ہے، کیونکہ ذاتی معلومات افشا کرنے کے معاملے میں عوامی مفاد کے تحفظ کو ختم کر دیا گیا ہے۔ درخواستوں میں آر ٹی آئی ایکٹ کی دفعہ 8(1)(j) میں کی گئی ترمیم کو چیلنج کیا گیا ہے۔ یہ دفعہ ذاتی معلومات کے افشا سے متعلق استثنیٰ سے متعلق ہے۔