نئی دہلی

سپریم کورٹ نے پیر کے روز مغربی بنگال حکومت کو کولکتہ میٹرو ریل پروجیکٹ کے ایک کوریڈور کی تعمیر میں رکاوٹیں پیدا کرنے پر سخت سرزنش کی۔ عدالت نے ریاستی حکومت سے کہا کہ عوامی مفاد کی ترقیاتی منصوبوں کو سیاسی رنگ نہ دیا جائے۔ چیف جسٹس (سی جے آئی) سوریاکانت، جسٹس جیمالیہ باگچی اور جسٹس وپل ایم پنچولی پر مشتمل بنچ نے ریاستی حکومت کی عرضی خارج کرتے ہوئے کلکتہ ہائی کورٹ کو منصوبے کی نگرانی جاری رکھنے کی ہدایت دی۔

بنچ نے کہا کہ ہائی کورٹ نے آپ (ریاستی حکومت) کے ساتھ کافی نرمی برتی ہے۔ یہ ایسا معاملہ تھا جس میں آپ کے چیف سکریٹری، ڈی جی پی اور دیگر افسران کے خلاف کارروائی ہونی چاہیے تھی۔” چیف جسٹس نے بنگال حکومت کے وکیل سے کہا کہ یہ آپ کے آئینی فرائض کی مکمل نظراندازی کو ظاہر کرتا ہے۔ آپ اپنی ذمہ داریوں سے بچ رہے ہیں۔ یہ ایک ایسے معاملے کو سیاسی بنانے کی کوشش ہے جس میں کوئی مسئلہ ہی نہیں ہے۔ ہم نہیں چاہیں گے کہ ریاستی حکومت کسی ایسے ترقیاتی معاملے کو سیاسی بنائے جو عام آدمی کے لیے فائدہ مند ہو۔

چیف جسٹس سوریاکانت نے کہا، “ہمیں ہر چیز کو سیاسی رنگ نہیں دینا چاہیے۔ یہ ترقی سے متعلق معاملہ ہے اور عوام کی سہولت کے لیے ہے، اس میں رکاوٹیں نہ ڈالیں۔” حکومت کے وکیل نے دلیل دی کہ آنے والے انتخابات کی وجہ سے ضابطۂ اخلاق نافذ ہے اور بورڈ امتحانات جاری ہیں، اس پر بنچ نے کہا کہ ہائی کورٹ کا حکم 23 دسمبر 2025 کا ہے، تو ریاستی حکومت نے اب تک اس پر عمل کیوں نہیں کیا؟

جسٹس باگچی نے کہا کہ الیکشن کمیشن اس منصوبے پر اعتراض نہیں کر سکتا کیونکہ یہ پہلے سے جاری ہے اور ہائی کورٹ اس کی نگرانی کر رہا ہے۔ انہوں نے کہا کہ آپ کے لیے تہوار ترقی سے زیادہ اہم ہیں۔ یہ آپ کی مرضی نہیں بلکہ آپ کا فرض ہے۔ کیا تہوار ٹرانسپورٹ منصوبے کی تعمیر سے زیادہ اہم ہیں؟انہوں نے مزید کہا کہ یہ منصوبہ ضابطۂ اخلاق نافذ ہونے سے پہلے شروع کیا گیا تھا۔ ہم ریاست کو اسے ترقی میں رکاوٹ ڈالنے کے بہانے کے طور پر استعمال کرنے کی اجازت نہیں دیں گے۔

ریاستی حکومت کے وکیل نے کہا کہ تعمیراتی کام کے دوران سڑکیں بند کرنی پڑیں گی جس سے ایمبولینس اور ہنگامی خدمات متاثر ہوں گی۔ انہوں نے مئی تک کا وقت مانگا، لیکن سپریم کورٹ نے یہ درخواست مسترد کر دی اور 23 دسمبر 2025 کے حکم کے خلاف دائر اپیل کو خارج کر دیا۔ بنچ نے کہا کہ یہ افسران کے ہٹ دھرم رویے کو ظاہر کرتا ہے جو کولکتہ میٹرو پروجیکٹ کو ٹالنے اور روکنے کی کوشش کر رہے ہیں۔ ہائی کورٹ کے حکم میں کوئی خامی نہیں ہے اور ہمیں یقین ہے کہ منصوبہ وقت پر مکمل ہوگا۔

اس سے قبل ہائی کورٹ نے 23 دسمبر کو سالٹ لیک کے سیکٹر-5 میں واقع آئی ٹی ہب کو جنوبی کولکتہ کے بڑے علاقوں سے جوڑنے والے منصوبے میں تاخیر پر تشویش ظاہر کی تھی۔ یہ تاخیر پولیس کی جانب سے ناکہ بندی کی اجازت دینے کے معاملے میں تعطل کے باعث ہو رہی تھی۔ عدالت نے ہدایت دی تھی کہ کام 15 فروری 2026 تک مکمل کیا جائے۔ اس نے ریاستی حکام کو یہ بھی ہدایت دی تھی کہ وہ 6 جنوری تک میٹرو ریلوے کو مطلع کریں کہ ایسٹرن میٹروپولیٹن بائی پاس پر واقع مصروف چنگری گھاٹا کراسنگ پر کام مکمل کرنے کے لیے کن تین دنوں میں ٹریفک بند رکھا جائے گا۔