نئی دہلی: سپریم کورٹ نے ہماچل پردیش میں مقامی بلدیاتی انتخابات کرانے کے لیے ہائی کورٹ کی مقرر کردہ مدت میں توسیع کرتے ہوئے جمعہ کے روز 30 اپریل کی بجائے 31 مئی تک انتخابی عمل مکمل کرنے کی اجازت دے دی۔ چیف جسٹس سوریہ کانت اور جسٹس جوئے مالیا باگچی پر مشتمل بنچ نے ریاستی حکومت کے پرنسپل سکریٹری کی جانب سے دائر درخواست پر غور کرتے ہوئے تعمیر نو، حد بندی (پریسیمَن) اور ریزرویشن کے عمل کو مکمل کرنے کے لیے ہائی کورٹ کی مقرر کردہ 28 فروری کی آخری تاریخ کو بھی بڑھا کر 31 مارچ کر دیا۔

ہماچل پردیش ہائی کورٹ نے 9 جنوری کو ریاستی حکومت کی وہ درخواست مسترد کر دی تھی جس میں بلدیاتی انتخابات چھ ماہ کے لیے ملتوی کرنے کی استدعا کی گئی تھی، اور حکومت کو 30 اپریل سے پہلے انتخابات کرانے کی ہدایت دی تھی۔ سپریم کورٹ نے ایک ماہ کی مہلت دیتے ہوئے کہا کہ ہائی کورٹ کا یہ مشاہدہ درست ہے کہ حد بندی کا عمل زیر التوا ہونا دیہی اور شہری بلدیاتی اداروں کے انتخابات میں تاخیر کی بنیاد نہیں بن سکتا۔

بنچ نے کہا کہ مانسون اور پہاڑی ریاست میں عام طور پر پیش آنے والی مشکلات کو مدنظر رکھتے ہوئے انتخابی عمل 31 مئی سے پہلے مکمل کر لیا جانا چاہیے۔ ہائی کورٹ نے انتخابات ملتوی کرنے کو چیلنج کرنے والی مفادِ عامہ کی عرضی نمٹاتے ہوئے ہماچل حکومت اور ریاستی انتخابی کمیشن کو 30 اپریل تک مکمل انتخابی عمل انجام دینے کا حکم دیا تھا۔

ریاستی حکومت نے مؤقف اختیار کیا تھا کہ گزشتہ سال مانسون کے دوران آنے والے سیلاب کے سبب سرکاری و نجی املاک اور سڑکوں کو بڑے پیمانے پر نقصان پہنچا ہے، اس لیے زمینی صورتحال بہتر ہونے تک انتخابی عمل مؤخر کیا جائے۔ حکومت نے یہ بھی دلیل دی تھی کہ ریاست میں ڈیزاسٹر ایکٹ نافذ ہے۔ تاہم، ہائی کورٹ نے مسلسل تین دن تک دلائل سننے کے بعد حکومت کو 30 اپریل سے پہلے انتخابات کرانے کی ہدایت برقرار رکھی تھی۔