نئی دہلی: سپریم کورٹ نے پیر کو کرناٹک حکومت سے کہا کہ وہ کاویری واٹر مینجمنٹ اتھارٹی کی جانب سے تمل ناڈو کے لیے کاویری کا پانی چھوڑنے سے متعلق ہدایات پر عمل درآمد یقینی بنائے۔ تمل ناڈو حکومت نے سپریم کورٹ کے سامنے دعویٰ کیا کہ اتھارٹی کی ہدایات پر عمل نہیں کیا جا رہا ہے، جبکہ کرناٹک حکومت نے کہا کہ جو تصویر پیش کی جا رہی ہے وہ ’’حقیقت پر مبنی نہیں‘‘ ہے۔

کاویری واٹر ریگولیشن کمیٹی نے کرناٹک حکومت کو ہدایت دی تھی کہ وہ 12 اگست سے 15 دن تک روزانہ 12 ہزار کیوسک پانی تمل ناڈو کے لیے جاری کرے۔ بعد میں اتھارٹی نے بھی اس فیصلے کو برقرار رکھا تھا۔ پیر کو سپریم کورٹ میں تمل ناڈو حکومت کی اس درخواست پر سماعت ہوئی، جس میں کرناٹک حکومت کو فوری طور پر پانی چھوڑنے کی ہدایت دینے کی اپیل کی گئی تھی۔

سماعت جسٹس وکرم ناتھ اور جسٹس سندیپ مہتا پر مشتمل بنچ نے کی۔ بنچ نے کہا، ’’اس معاملے کو ایک ہفتے بعد فہرست میں شامل کیا جائے، تاکہ پانی چھوڑنے کے بارے میں عدالت کو آگاہ کیا جا سکے۔‘‘ بنچ نے معاملے کی اگلی سماعت کے لیے 24 اگست کی تاریخ مقرر کردی۔ عدالت نے واضح ہدایت دیتے ہوئے کہا، ’’اتھارٹی کی ہدایات پر عمل درآمد یقینی بنایا جائے۔‘‘