نئی دہلی: انتخابی کمیشن نے سپریم کورٹ کو بتایا ہے کہ اس نے پہلے ہی ہدایت دے دی تھی کہ بہار میں ترمیم شدہ ووٹر لسٹ میں نام شامل کرنے یا نکالنے کے لیے آدھار کارڈ کو شہریت کے ثبوت کے طور پر نہیں بلکہ شناخت کے ثبوت کے طور پر استعمال کیا جائے۔

کمیشن نے سپریم کورٹ میں دائر جواب میں کہا کہ عدالت نے 8 ستمبر کو ووٹر لسٹ کو اپ ڈیٹ کرنے کے لیے آدھار کے استعمال کے قواعد واضح کر دیے تھے۔ انتخابی کمیشن نے کہا کہ عدالت نے وضاحت کی تھی کہ ریپریزنٹیشن آف پیپلز ایکٹ (RPA) 1950 کی شق 23(4) کے تحت آدھار کارڈ کا استعمال شناخت قائم کرنے کے مقصد سے ہونا چاہیے۔ آر پی اے کی شق 23 ووٹر لسٹ میں نام شامل کرنے سے متعلق ہے۔

انتخابی کمیشن نے کہا، “مندرجہ بالا حکم کی تعمیل کرتے ہوئے کمیشن نے بہار کے چیف الیکشن افسر (CEO) کو 9 ستمبر 2025 کو ہدایت دی تھی کہ ریاست کی ترمیم شدہ ووٹر لسٹ میں نام شامل یا خارج کرنے کے لیے آدھار کو شناخت کے ثبوت کے طور پر استعمال کیا جائے، نہ کہ شہریت کے ثبوت کے طور پر۔”

کمیشن نے وکیل اشونی کمار اوپادھیائے کی جانب سے دائر اس عبوری عرضی پر جواب جمع کرایا، جس میں یہ ہدایت دینے کی درخواست کی گئی تھی کہ آدھار کا استعمال RPA 1950 کی شق 23(4) کے مطابق صرف شناخت اور تصدیق کے لیے کیا جائے۔

انتخابی کمیشن نے بتایا کہ بھارت خصوصی شناخت اتھارٹی (UIDAI) نے اگست 2023 میں جاری ایک آفس نوٹ میں واضح کیا تھا کہ آدھار شہریت، رہائش یا تاریخ پیدائش کا ثبوت نہیں ہے۔ کمیشن نے کہا کہ بمبئی ہائی کورٹ نے ایک معاملے میں متعلقہ آفس نوٹ کا حوالہ دیتے ہوئے واضح کیا تھا کہ آدھار دراصل تاریخ پیدائش کا ثبوت نہیں ہے اور اسے ثابت کرنے کی ذمہ داری آدھار ہولڈر پر ہے۔

انتخابی کمیشن نے کہا، “یہ بات بھی اہم ہے کہ سپریم کورٹ نے 8 ستمبر 2025 کے اپنے حکم کے ذریعے ووٹر لسٹ میں نام شامل کرنے اور نکالنے کے لیے آدھار کے استعمال کے قواعد پہلے ہی واضح کر دیے تھے۔” سپریم کورٹ نے اوپادھیائے کی عرضی پر 7 اکتوبر کو نوٹس جاری کیا تھا اور کہا تھا کہ عدالت پہلے ہی کہہ چکی ہے کہ آدھار شہریت یا رہائش کا ثبوت نہیں ہے۔

یہ عرضی اس زیر التوا درخواست کے تناظر میں دائر کی گئی تھی، جس میں انتخابی کمیشن سے ملک بھر میں ووٹر لسٹوں کے باقاعدہ اور گہرائی سے جائزے (Special Intensive Revision – SIR) کرنے کی ہدایت دینے کی درخواست کی گئی تھی۔