نئی دہلی: سپریم کورٹ نے مرکزی حکومت سے کہا ہے کہ وہ مسلح افواج کے اہلکاروں کی سروس شرائط اور ریٹائرمنٹ کی عمر سے متعلق برطانوی دور کے اصولوں پر قائم نہ رہے اور ’’انتہائی ماہر‘‘ ساحلی محافظ (کوسٹ گارڈ) کے معیارات پر نظرثانی کے لیے ایک ماہر کمیٹی تشکیل دینے پر غور کرے۔

چیف جسٹس سوریہ کانت اور جسٹس جوئمالیہ باگچی کی بنچ نے دہلی ہائی کورٹ کے اس حکم پر عمل درآمد روک دیا، جس میں بھارتی کوسٹ گارڈ میں تمام سطحوں پر ریٹائرمنٹ کی عمر 60 سال یکساں طور پر لاگو کرنے کی ہدایت دی گئی تھی۔ چیف جسٹس نے ایڈیشنل سالیسٹر جنرل ارچنا پاٹھک دوے سے کہا کہ سروس شرائط اور ریٹائرمنٹ کی عمر سے متعلق قواعد کا ازسرنو جائزہ لینے کا وقت آ گیا ہے۔

انہوں نے کہا کہ حکومت برطانوی دور کے بنائے گئے قوانین سے چمٹی نہیں رہ سکتی اور موجودہ دور میں کوسٹ گارڈ کا کردار انتہائی اہم ہے، جب کہ موجودہ ریٹائرمنٹ عمر پرانا نظام ظاہر کرتی ہے۔ سپریم کورٹ مرکزی حکومت کی اس اپیل پر سماعت کر رہا تھا، جس میں دہلی ہائی کورٹ کے گزشتہ سال کے اس فیصلے کو چیلنج کیا گیا تھا جس کے تحت کوسٹ گارڈ (جنرل) رولز 1986 کے قاعدہ 20(1) اور 20(2) کو منسوخ کر دیا گیا تھا۔

ان قواعد کے مطابق کمانڈنٹ اور اس سے نچلے درجے کے افسران 57 سال کی عمر میں ریٹائر ہوتے تھے، جبکہ کمانڈنٹ سے اوپر کے افسران کی ریٹائرمنٹ عمر 60 سال تھی۔ سپریم کورٹ نے کہا کہ اتنے جدید اور اعلیٰ مہارت کے حامل فورس میں تجربہ خصوصی اہمیت رکھتا ہے اور حکومت کو سروس شرائط کے معاملے میں ’’حد سے زیادہ جامد یا قدامت پسندانہ رویہ‘‘ اختیار نہیں کرنا چاہیے۔

عدالت نے نوٹس جاری کرتے ہوئے کہا کہ اگلی سماعت تک متنازع فیصلے پر روک برقرار رہے گی۔ جواب داخل کرنے کے لیے دو ہفتوں کی مہلت دی گئی ہے اور اس کے بعد دو ہفتوں میں معاملہ دوبارہ سماعت کے لیے درج کیا جائے گا۔ عدالت نے مرکزی حکومت کو ہدایت دی کہ وہ کوسٹ گارڈ اہلکاروں کی سروس شرائط، خصوصاً بھرتی کی عمر سے لے کر ریٹائرمنٹ کی عمر تک، کے جامع جائزے کے لیے ایک ماہر کمیٹی تشکیل دے اور اس کی رپورٹ عدالت میں پیش کی جائے۔

ایڈیشنل سالیسٹر جنرل نے مؤقف اختیار کیا کہ ہائی کورٹ نے کوسٹ گارڈ کا موازنہ بھارت-تبت سرحدی پولیس، سی آر پی ایف، سی آئی ایس ایف اور ایس ایس بی جیسے دیگر سکیورٹی فورسز سے کر کے غلطی کی۔ انہوں نے کہا کہ کوسٹ گارڈ وزارت دفاع کے ماتحت ایک سکیورٹی فورس ہے، جسے سمندر میں انتہائی مشکل حالات میں کام کرنا پڑتا ہے اور جس کے لیے نسبتاً کم عمر اور مکمل طبی طور پر فٹ اہلکار درکار ہوتے ہیں۔

انہوں نے مزید کہا کہ ریٹائرمنٹ کی عمر کو بھرتی کی عمر سے جوڑ کر ایک متعین مدتِ ملازمت یقینی بنائی جاتی ہے اور یہ پالیسی کا معاملہ ہے۔ اگر ہائی کورٹ کے حکم میں مداخلت نہ کی گئی تو دیگر دفاعی خدمات میں بھی اسی نوعیت کے مطالبات اٹھ سکتے ہیں۔

دہلی ہائی کورٹ نے 24 نومبر کے اپنے فیصلے میں کہا تھا کہ کوسٹ گارڈ میں مختلف درجات کے لیے مختلف ریٹائرمنٹ عمر مقرر کرنے کی کوئی معقول بنیاد نہیں ہے اور یہ آئین کے آرٹیکل 14 اور 16 کی خلاف ورزی ہے۔ عدالت نے قواعد 20(1) اور 20(2) کو غیر آئینی قرار دیتے ہوئے تمام عہدوں کے لیے 60 سال کی یکساں ریٹائرمنٹ عمر نافذ کرنے کا حکم دیا تھا۔ یہ حکم کوسٹ گارڈ کے ریٹائرڈ افسران کی جانب سے دائر درخواستوں پر جاری کیا گیا تھا۔