نئی دہلی: سپریم کورٹ نے کیرالہ کے ایک نجی ڈینٹل کالج کے پہلے سال کے بی ڈی ایس طالب علم کو مبینہ طور پر خودکشی پر اکسانے کے الزام میں نامزد پروفیسر کو پیشگی ضمانت دینے سے انکار کر دیا۔ عدالت نے پیر کے روز کہا کہ ایک استاد طلبہ کے ساتھ اس طرح کا رویہ اختیار کرنے کے بعد قانون سے نہیں بچ سکتا۔ پہلے سال کے طالب علم نتن راج 10 اپریل کو کالج کی ایک عمارت سے گرنے کے بعد مردہ پائے گئے تھے۔

اس واقعے کو مشتبہ خودکشی قرار دیا گیا تھا۔ استغاثہ کے مطابق درج فہرست ذات (ایس سی) سے تعلق رکھنے والے طالب علم کو ملزم پروفیسر ایم کونڈانا رام نے کلاس روم میں مبینہ طور پر ذلیل کیا اور دھمکیاں دیں، تاہم پروفیسر نے ان الزامات سے انکار کیا ہے۔

جسٹس وکرم ناتھ اور جسٹس سندیپ مہتا پر مشتمل بنچ نے سماعت کے دوران درخواست گزار کے وکیل سے کہا، "یہ پیغام جانا چاہیے کہ اساتذہ طلبہ کے ساتھ اس طرح کا سلوک نہیں کر سکتے۔" سپریم کورٹ نے یہ فیصلہ پروفیسر رام کی اس درخواست پر سنایا، جس میں انہوں نے جون 2026 کے کیرالہ ہائی کورٹ کے اس حکم کو چیلنج کیا تھا جس کے ذریعے انہیں پیشگی ضمانت دینے سے انکار کر دیا گیا تھا۔ سپریم کورٹ نے ہائی کورٹ کے فیصلے میں مداخلت سے انکار کرتے ہوئے کہا کہ ہر شخص کو یہ سمجھنا چاہیے کہ اس کے اعمال کا طلبہ پر کیا اثر پڑ سکتا ہے۔