نئی دہلی: ملک کی سب سے بڑی عدالت نے پیر کے روز دارالحکومت دہلی اور اس کے مضافات میں حکام کو حکم دیا کہ آٹھ ہفتوں کے اندر تمام آوارہ کتوں کو شیلٹروں میں منتقل کیا جائے۔ یہ حکم میڈیا کی ان رپورٹس کے بعد آیا ہے جن میں ریبیز کے واقعات، خاص طور پر بچوں میں، بڑھنے کی نشاندہی کی گئی تھی۔حکومت نے اپریل میں کہا تھا کہ جنوری میں ملک بھر میں تقریباً 4 لاکھ 30 ہزار کتوں کے کاٹنے کے واقعات رپورٹ ہوئے، جبکہ پورے 2024 میں یہ تعداد 37 لاکھ تھی۔

مارز پیٹ کیئر کے "اسٹیٹ آف پیٹ ہوم لیسنیس" سروے کے مطابق، بھارت میں 5 کروڑ 25 لاکھ آوارہ کتے ہیں، جبکہ 80 لاکھ بے گھر کتے شیلٹروں میں ہیں۔مقامی میڈیا رپورٹس کے مطابق، صرف دہلی میں ہی 10 لاکھ آوارہ کتے موجود ہیں۔ رائٹرز اس تعداد کی آزادانہ تصدیق نہیں کر سکا۔ عدالت نے یہ کیس اس وقت سنا جب مقامی میڈیا میں دہلی میں آوارہ کتوں کے بچوں کو کاٹنے اور کچھ واقعات میں جان لیوا ہونے کی خبریں سامنے آئیں۔پیر کو لائیو لا نے رپورٹ کیا کہ عدالت نے دہلی حکام کو ہدایت دی ہے کہ شہر بھر سے آوارہ کتوں کو پکڑ کر ڈاگ شیلٹروں میں منتقل کیا جائے۔

عدالت نے لائیو لا کے مطابق کہا کہ نومولود اور چھوٹے بچے کسی بھی قیمت پر ریبیز کا شکار نہ ہوں۔ کارروائی ایسی ہونی چاہیے کہ عوام کو یقین ہو کہ وہ بلا خوف و خطر آزادانہ گھوم سکتے ہیں۔ اس معاملے میں کسی قسم کے جذبات کو شامل نہ کیا جائے۔ حکومت کے سالیسٹر جنرل تشار مہتا نے دہلی حکومت کی جانب سے مؤقف اختیار کیا کہ مضبوط اقدامات کی ضرورت ہے کیونکہ "نس بندی صرف ان کی آبادی میں اضافے کو روکتی ہے، مگر یہ کتوں کی ریبیز پھیلانے کی صلاحیت کو ختم نہیں کرتی۔تاہم اس اقدام کو ماہرینِ تحفظِ ماحولیات کی جانب سے اس کے نفاذ کے طریقۂ کار پر تنقید کا سامنا ہے۔کنزرویشن بایولوجسٹ بہار دت نے ایکس پر پوسٹ میں کہا: "ہزاروں کتوں کو رکھنے کے لیے شیلٹر کہاں ہیں؟" انہوں نے سپریم کورٹ کے اس حکم کو "غیر عملی اور غیر سائنسی اقدام" قرار دیا۔این جی او "سیو اے اسٹری" کے بانی ودیت شرما نے ایکس پر کہا: "ہمیں بڑے پیمانے پر ویکسینیشن اور بڑے پیمانے پر نس بندی کی ضرورت ہے— یہی واحد انسانی اور ثابت شدہ طریقے ہیں جن سے تنازعات کم کیے جا سکتے ہیں۔"