نئی دہلی: دہلی پولیس نے آوارہ کتوں کے معاملات میں نوڈل افسران کی تقرری سے متعلق جاری ایک فارم کے بارے میں سوشل میڈیا پر غلط معلومات پھیلانے کے الزام میں، ڈائریکٹوریٹ آف ایجوکیشن کی شکایت کے بعد جمعہ کو ایف آئی آر درج کی ہے۔

دہلی کے وزیرِ تعلیم آشیش سود نے کہا کہ حکومت نے اس معاملے پر عام آدمی پارٹی کے قومی کنوینر اروند کیجریوال کی جانب سے پھیلائی جا رہی "غلط معلومات" کے خلاف کارروائی کرنے کا فیصلہ کیا ہے۔ ڈائریکٹوریٹ آف ایجوکیشن نے اس معاملے میں قانونی کارروائی کا مطالبہ کرتے ہوئے پولیس میں باضابطہ شکایت درج کرائی تھی۔

اس سلسلے میں بھارتی نیائے سنہتا (بی این ایس) کی دفعہ 353(1) (کسی بھی بیان، جھوٹی اطلاع، افواہ یا رپورٹ کو تیار کرنا، شائع کرنا یا پھیلانا، جس میں الیکٹرانک ذرائع بھی شامل ہیں) اور دفعہ 192 (فساد بھڑکانے کے ارادے سے جان بوجھ کر اکسانا، اگر فساد واقع ہو) کے تحت ایف آئی آر درج کی گئی ہے۔

سود نے پریس کانفرنس میں کہا کہ کیجریوال نے پہلے سوشل میڈیا پر ایک پیغام پوسٹ کیا تھا جس میں دعویٰ کیا گیا تھا کہ دہلی کے اساتذہ سے بچوں کو پڑھانے کے بجائے آوارہ کتوں کی گنتی کرانے کو کہا جا رہا ہے۔ انہوں نے کہا، اس ٹویٹ کے سلسلے میں جمعرات کو پولیس میں شکایت درج کرائی گئی تھی۔ سود نے عام آدمی پارٹی کے رہنماؤں پر جان بوجھ کر عوام کو گمراہ کرنے کا الزام لگاتے ہوئے کہا کہ ایف آئی آر درج ہونے کے بعد پارٹی خود کو مظلوم کے طور پر پیش کرنا شروع کر دے گی۔