واشنگٹن/ آواز دی وائس

امریکہ کے صدر ڈونلڈ ٹرمپ نے یوکرین کے صدر وولودیمیر زیلنسکی کے ساتھ جمعہ کے روز وائٹ ہاؤس (امریکی صدر کی سرکاری رہائش گاہ اور دفتر) میں طویل ملاقات کے بعد یوکرین اور روس کے درمیان جاری جنگ ختم کرنے کی اپیل کی۔ انہوں نے کہا کہ وہ جہاں ہیں، وہیں رک جائیں۔

ٹرمپ نے صدر کا عہدہ سنبھالنے کے بعد سے کئی بار اس جنگ کے جاری رہنے پر مایوسی ظاہر کی ہے، مگر ان کا یہ تازہ بیان یوکرین کے لیے ایک واضح پیغام سمجھا جا رہا ہے کہ وہ روس کے قبضے میں گئے علاقوں کو واپس لینے کی کوشش ترک کر دے۔ ٹرمپ نے زیلنسکی اور ان کی ٹیم کے ساتھ دو گھنٹے سے زائد گفتگو کے بعد اپنے سوشل میڈیا پلیٹ فارم "ٹروتھ سوشل" پر لکھا کہ کافی خون بہہ چکا ہے۔ زمین کی سرحدیں جنگ اور حوصلے سے طے ہو رہی ہیں۔

انہوں نے مزید کہا کہ انہیں وہیں رک جانا چاہیے جہاں وہ ہیں۔ دونوں فریق کو اپنی فتح کا دعویٰ کرنے دیں، باقی فیصلہ تاریخ کرے گی۔ بعد ازاں فلوریڈا پہنچنے پر ٹرمپ نے دونوں ممالک سے "فوراً جنگ روکنے" کی اپیل کی اور اشارہ دیا کہ روس یوکرین سے چھینا گیا علاقہ اپنے پاس رکھ سکتا ہے۔

انہوں نے صحافیوں سے کہا کہ آپ جنگی لکیر پر چلیں، چاہے وہ کہیں بھی ہو ورنہ معاملہ بہت پیچیدہ ہو جائے گا۔ ٹرمپ نے مزید کہا کہ آپ جنگی لکیر پر رک جائیں، دونوں فریق اپنے گھروں کو لوٹ جائیں، اپنے خاندانوں کے پاس جائیں، اور قتل و خون بند کریں۔ جمعہ کی ملاقات کے بعد صدر زیلنسکی نے کہا کہ اب جنگ بندی اور مذاکرات کا وقت آ گیا ہے۔ تاہم، انہوں نے اس سوال کا براہِ راست جواب دینے سے گریز کیا کہ کیا ٹرمپ یوکرین پر زمین چھوڑنے کا دباؤ ڈال رہے ہیں۔

جب صحافیوں نے زیلنسکی سے ٹرمپ کی پوسٹ کے بارے میں سوال کیا تو یوکرینی صدر نے کہا کہ صدر درست کہہ رہے ہیں۔ ہمیں وہیں رکنا ہوگا جہاں ہم ہیں، اور پھر بات چیت کرنی ہوگی۔ جنگ کے معاملے پر ٹرمپ کا مؤقف اس وقت بدلا جب انہوں نے جمعرات کو روسی صدر ولادیمیر پوتن سے طویل فون گفتگو کی۔ بات چیت کے بعد ٹرمپ نے اعلان کیا کہ وہ آنے والے ہفتوں میں ہنگری کے دارالحکومت بڈاپیسٹ میں روسی رہنما سے ملاقات کی منصوبہ بندی کر رہے ہیں۔

زیلنسکی نے گزشتہ ہفتے غزہ میں ہوئے جنگ بندی اور یرغمالی معاہدے پر ٹرمپ کو مبارکباد دی اور کہا کہ اب ٹرمپ کے پاس روس-یوکرین جنگ ختم کرنے کا ایک بڑا موقع ہے۔ امریکی صدر نے عندیہ دیا ہے کہ وہ کیف کو طویل فاصلے کی میزائل نظام فروخت کرنے کی اجازت دینے کے حق میں نہیں ہیں، حالانکہ یوکرین کو اس کی شدید ضرورت ہے۔

حال ہی میں ٹرمپ نے یوکرین کو طویل فاصلے کی "ٹام ہاک کروز میزائل" فروخت کرنے کا ارادہ ظاہر کیا تھا، جس پر پوتن نے خبردار کیا تھا کہ ایسے اقدام سے امریکہ اور روس کے تعلقات مزید کشیدہ ہو جائیں گے۔