نئی دہلی: بھارتی ریزرو بینک (آر بی آئی) کے گورنر سنجے ملہوترا نے جمعہ کو کہا کہ ملک کی معاشی صورتحال مضبوط ہے اور حکومت و مرکزی بینک کی جانب سے کیے گئے حالیہ اقدامات سے غیر ملکی سرمایہ کاری اور سرمایہ کے بہاؤ میں مزید اضافہ ہوگا۔ دوماہی مالیاتی پالیسی جائزے کے بعد پریس کانفرنس سے خطاب کرتے ہوئے سنجے ملہوترا نے واضح کیا کہ 4 فیصد افراطِ زر (مہنگائی) کا ہدف برقرار ہے اور اسے مؤخر نہیں کیا گیا۔ اگرچہ آر بی آئی نے مالی سال 2026-27 کے لیے افراطِ زر کا تخمینہ بڑھا کر 5.1 فیصد کر دیا ہے، تاہم ریپو ریٹ میں کوئی تبدیلی نہیں کی گئی۔

ملہوترا نے کہا کہ مجموعی طور پر بھارتی معیشت اچھی حالت میں ہے اور امید ہے کہ موجودہ صورتحال مستقبل میں مزید مضبوط معاشی ترقی کا موقع فراہم کرے گی۔ انہوں نے بتایا کہ آر بی آئی اور مرکزی حکومت کی جانب سے سرمایہ کے بہاؤ کے لیے کوئی مخصوص ہدف مقرر نہیں کیا گیا، تاہم حالیہ اقدامات سے غیر ملکی سرمایہ کاری میں اضافہ متوقع ہے۔

حکومت نے روپے پر دباؤ کم کرنے اور غیر ملکی سرمایہ کاروں کو راغب کرنے کے لیے سرکاری بانڈز میں سرمایہ کاری کرنے والے غیر ملکی سرمایہ کاروں کو سودی آمدنی اور سرمایہ جاتی منافع پر انکم ٹیکس سے استثنا دیا ہے۔ دوسری جانب آر بی آئی نے فل ایکسیس روٹ (ایف اے آر) کے تحت قابلِ سرمایہ کاری سرکاری سیکیورٹیز کی فہرست میں 15، 30 اور 40 سالہ نئے سرکاری بانڈز بھی شامل کر دیے ہیں۔

مرکزی بینک نے عام سرمایہ کاری کے راستے کے تحت غیر ملکی پورٹ فولیو سرمایہ کاروں (ایف پی آئی) پر عائد بعض پابندیاں بھی ختم کر دی ہیں، جن میں قلیل مدتی سرمایہ کاری، فنڈ رکھنے کی حد اور انفرادی سیکیورٹی کی حد شامل ہیں۔ آر بی آئی کی نائب گورنر پونم گپتا نے کہا کہ حالیہ اقدامات کے نتیجے میں رواں سال ملک کے ادائیگیوں کے توازن (بی او پی) میں بہتری کی توقع ہے۔

سنجے ملہوترا نے یہ بھی واضح کیا کہ فی الحال سرمایہ کے انخلا پر پابندی لگانے کے کسی اقدام پر غور نہیں کیا جا رہا۔ انہوں نے کہا کہ رسد میں رکاوٹوں کا دورانیہ اور اس کے قیمتوں پر اثرات آر بی آئی کے لیے سب سے بڑی تشویش ہیں۔ اس کے علاوہ کمزور مانسون اور ال نینو کی صورتحال بھی مہنگائی میں اضافے کا باعث بن سکتی ہے۔

آر بی آئی گورنر کے مطابق شرحِ سود میں اضافہ صرف اسی صورت میں کیا جائے گا جب مہنگائی مسلسل اور وسیع پیمانے پر برقرار رہے۔ انہوں نے پولیمر کرنسی نوٹوں کے اجرا سے متعلق سوال کے جواب میں کہا کہ اس تجویز پر غور جاری ہے، تاہم یہ معاملہ ابھی ابتدائی مرحلے میں ہے۔