چنئی: چنئی کے شری شکتی ونائگر مندر میں عقیدت اور جدت کا حسین امتزاج دیکھنے کو ملا، جہاں پانچ موٹروں سے چلنے والا ایک مشینی ہاتھی تمل ناڈو کے مذہبی منظرنامے میں ایک جدید تبدیلی کی علامت بن گیا ہے۔

اداکار سونو سود اور ان کے بیٹے ایان سود نے پیٹا انڈیا (پیپل فار دی ایتھیکل ٹریٹمنٹ آف اینیملز) اور پیپل فار کیٹل اِن انڈیا کے تعاون سے مندر کو “ایراوتم” نامی ایک روبوٹک ہاتھی تحفے میں دیا، تاکہ مقدس رسومات میں زندہ جانوروں کو کسی قسم کی تکلیف نہ اٹھانی پڑے۔ تین میٹر بلند فائبر گلاس سے تیار کردہ اس روبوٹک ہاتھی کی رونمائی پیر کے روز آرڈیننس کلاتھنگ فیکٹری کے چیف جنرل منیجر بی ایس ریڈی نے چنڈا میلم اور ناڈسورم کی دھنوں کے درمیان کی۔

تقریباً 500 کلوگرام وزنی اور پہیوں والے پلیٹ فارم پر نصب یہ مشینی ہاتھی سر ہلا سکتا ہے، دم حرکت دے سکتا ہے اور پانی کا چھڑکاؤ بھی کر سکتا ہے۔ اپنے فلاحی کاموں کے لیے معروف سونو سود نے کہا کہ جب عقیدت اور ہمدردی ایک ساتھ آتی ہیں تو حقیقی روحانیت نمایاں ہوتی ہے۔ پیٹا انڈیا کے “کمپیشنٹ یوتھ ایوارڈ” یافتہ ایان سود نے کہا کہ اس اقدام سے حقیقی ہاتھی جنگل میں اپنے خاندانوں کے ساتھ رہ سکیں گے۔

یہ پیٹا انڈیا کی جانب سے ملک بھر میں فراہم کیا جانے والا 21واں روبوٹک ہاتھی ہے اور تمل ناڈو میں اپنی نوعیت کا دوسرا ہاتھی ہے۔ مندر کے صدر ایس ایس مروگن نے اس اقدام کا خیرمقدم کرتے ہوئے کہا کہ مندر نے باضابطہ طور پر عہد کیا ہے کہ وہ نہ کبھی زندہ جانور رکھے گا اور نہ ہی انہیں کرائے پر لے گا۔