نئی دہلی/ آواز دی وائس
دہلی کے سیلم پور کے رہائشی محمد ہارون کو چند دن قبل پاکستان کے لیے جاسوسی کے الزام میں گرفتار کیا گیا۔ اتر پردیش کی انسداد دہشت گردی اسکواڈ (اے ٹی ایس) کا دعویٰ ہے کہ ہارون کے پاکستانی ایجنسیوں سے روابط تھے اور اُس نے ہندوستان کی داخلی سلامتی سے متعلق نہایت اہم معلومات اُن کے ساتھ شیئر کیں۔ تاہم ہارون کے اہلِ خانہ کا کہنا ہے کہ اُسے بلاوجہ پھنسایا جا رہا ہے، اور وہ صرف اس لیے پاکستان جاتا تھا کیونکہ اس کی دوسری بیوی وہاں رہتی ہے۔ ہارون کا پیشہ کباڑ کا کام ہے۔
یاد رہے کہ "آپریشن سیندور" کے بعد حالیہ دنوں میں پاکستان کے لیے جاسوسی کے الزام میں ہریانہ، پنجاب اور اتر پردیش سے کئی افراد کو گرفتار کیا گیا ہے۔
پاکستانی ہائی کمیشن کے اہلکار سے رابطہ
اے ٹی ایس کے مطابق ہارون پاکستان ہائی کمیشن کے ایک ملازم کے ساتھ رابطے میں تھا، جو کہ اس کے ویزا معاملات میں مدد کرتا تھا۔ بتایا گیا ہے کہ وہ ملازم ہارون کے بینک اکاؤنٹ کا استعمال پیسے جمع کرنے کے لیے کرتا تھا۔ جب یہ بات ہندوستانی حکام کے علم میں آئی تو اُس اہلکار کو "شخصِ ناپسندیدہ" قرار دے کر ملک چھوڑنے کا حکم دیا گیا۔
خاندان کی حالت اور دوسری شادی
ہارون کے بھائی وسیم نے بتایا کہ ان کے بھائی کی مالی حالت کمزور ہے، وہ چار بھائی ہیں اور ہارون اپنی کباڑ کی دکان سیلم پور کے گھر سے ہی چلاتا ہے۔ وسیم نے بتایا کہ بدھ کے روز پولیس کے اہلکار سادہ کپڑوں میں ان کے گھر آئے اور ہارون سے پوچھا کہ کیا وہ حال ہی میں پاکستان گیا تھا، جس پر اُس نے جواب دیا کہ وہ اپنی بیوی سے ملنے گیا تھا جو پاکستان کے گوجرانوالہ میں رہتی ہے۔
پولیس نے ہارون کا فون ضبط کر لیا اور اُسے اپنے ساتھ لے گئی۔ بعد میں اہل خانہ کو بتایا گیا کہ ہارون نوئیڈا میں اے ٹی ایس کے ساتھ ہے، اور پھر اگلے دن کہا گیا کہ وہ لکھنؤ آکر اس سے ملاقات کریں۔ ہارون پر ہندوستانی قوانین کے تحت سنگین دفعات کے تحت مقدمہ درج کیا گیا ہے۔
دہلی لانا چاہتا تھا بیوی کو
وسیم نے مزید بتایا کہ ہارون نے دو شادیاں کی تھیں، پہلی 2007 میں دہلی کی ایک خاتون سے کی تھی، جس سے تین بچے ہیں۔ دوسری شادی اُس نے کورونا لاک ڈاؤن کے دوران پاکستان میں اپنی چچازاد سے کی۔ وہ بیوی کو دہلی لانا چاہتا تھا مگر کامیاب نہ ہو سکا۔ وسیم نے اس بات کی تردید کی کہ ہارون ویزا کے کاموں میں ملوث تھا۔ اہلِ خانہ کا مؤقف ہے کہ محمد ہارون ایک عام شخص ہے اور اُسے غلط الزامات کے تحت نشانہ بنایا جا رہا ہے۔
