پریٹوریا: جنوبی افریقہ کی دوسری سب سے بڑی جماعت ڈیموکریٹک الائنس نے پہلگام میں ہونے والے دہشت گردانہ حملے کے متاثرین سے یکجہتی کا اظہار کیا ہے اور سرحد پار دہشت گردی سے نمٹنے کے ہندوستان کے عزم کی حمایت کی ہے۔

ہندوستانی ہم جماعتی وفد، جو 22 اپریل کو پہلگام میں دہشت گرد حملے کے بعد پاکستان سے جنم لینے والی دہشت گردی کے خلاف ہندوستان کا مؤقف پیش کرنے کے لیے 27 تا 29 مئی جنوبی افریقہ کے دورے پر ہے، نے جمعرات کے روز کیپ ٹاؤن میں جنوبی افریقی نمائندوں سے متعدد ملاقاتیں کیں۔

یہ وفد شردچندر پوار کی نیشنلسٹ کانگریس پارٹی کی رکن پارلیمان سپرِیا سولے کی قیادت میں جنوبی افریقی اراکین پارلیمان سے بھی ملا اور دہشت گردی کے خلاف ہندوستان کی زیرو ٹالرینس پالیسی اور اس عالمی خطرے کے خلاف ایک مشترکہ عالمی حکمت عملی کی ضرورت پر زور دیا۔ بدھ کو وفد نے ڈیموکریٹک الائنس کے رہنما اور جنوبی افریقہ کے وزیر زراعت جان اسٹیین ہائسن اور ڈی اے کے دیگر ارکان سے تفصیلی تبادلہ خیال کیا۔

پریٹوریا میں ہندوستانی سفارت خانے کی جانب سے جمعرات کو جاری کردہ بیان میں کہا گیا: ڈی اے نے پہلگام میں دہشت گرد حملے کے متاثرین سے یکجہتی ظاہر کی اور سرحد پار دہشت گردی کے خلاف ہندوستان کے عزم کی حمایت کی۔ وفد نے جنوبی افریقی صدارت کے نائب وزیر کینتھ مورولونگ سے بھی ملاقات کی اور انہیں ہندوستان کی انسداد دہشت گردی پالیسی سے آگاہ کیا، جو فوری اور فیصلہ کن اقدام پر مبنی ہے اور جس کے تحت دہشت گردوں اور ان کے حامیوں دونوں کو یکساں طور پر ذمہ دار ٹھہرایا جاتا ہے۔ بیان میں مزید کہا گیانائب وزیر نے کہا کہ وہ اس معاملے پر توجہ دیں گے اور اسے جنوبی افریقی صدارت کے علم میں لائیں گے۔