نئی دہلی: وزیرِاعظم نریندر مودی کی حکومت پر سخت تنقید کرتے ہوئے کانگریس پارلیمانی پارٹی کی چیئرپرسن سونیا گاندھی نے منگل کو کہا کہ ایران کے سپریم لیڈر آیت اللہ علی خامنہ ای کی ہدف بنا کر کی گئی ہلاکت پر حکومت کی خاموشی غیر جانبداری نہیں بلکہ ذمہ داری سے پیچھے ہٹنا ہے، اور یہ بھارت کی خارجہ پالیسی کی سمت اور اس کی ساکھ پر سنگین سوالات کھڑے کرتی ہے۔

کانگریس کی سابق صدر نے یہ مطالبہ بھی کیا کہ پارلیمنٹ کے بجٹ اجلاس کے دوسرے مرحلے میں عالمی نظام کے بکھرنے کے معاملے پر حکومت کی “تشویشناک خاموشی” پر کھل کر اور بغیر کسی لیت و لعل کے بحث ہونی چاہیے۔ روزنامہ ‘دی انڈین ایکسپریس’ میں شائع اپنے مضمون میں سونیا گاندھی نے کہا کہ ہمیں اپنی اخلاقی قوت کو “دوبارہ دریافت” کرنے اور اسے وضاحت اور عزم کے ساتھ ظاہر کرنے کی فوری ضرورت ہے۔

انہوں نے کہا، یکم مارچ کو ایران نے تصدیق کی کہ اس کے سپریم لیڈر آیت اللہ سید علی حسینی خامنہ ای ایک روز قبل امریکہ اور اسرائیل کی جانب سے کیے گئے ہدفی حملوں میں مارے گئے۔ جاری مذاکرات کے دوران کسی موجودہ سربراہِ مملکت کی ہلاکت عصری بین الاقوامی تعلقات میں ایک سنگین دراڑ پیدا کرتی ہے۔ انہوں نے کہا کہ اس چونکا دینے والے واقعے سے بڑھ کر نئی دہلی کی خاموشی بھی حیران کن ہے۔ سونیا گاندھی نے کہا کہ بھارت کی حکومت نے نہ تو اس ہلاکت کی مذمت کی ہے اور نہ ہی ایران کی خودمختاری کی خلاف ورزی کی۔