نئی دہلی/ آواز دی وائس

دہلی کی راؤز ایونیو کورٹ نے نیشنل ہیرالڈ معاملے میں سونیا گاندھی، راہل گاندھی اور پانچ دیگر کے خلاف انفورسمنٹ ڈائریکٹوریٹ (ای ڈی) کی جانب سے چلائے جا رہے منی لانڈرنگ کیس کا نوٹس لینے سے انکار کر دیا ہے۔ تاہم عدالت نے یہ بھی کہا ہے کہ مرکزی ایجنسی اس معاملے میں اپنی جانچ جاری رکھ سکتی ہے۔

بار اینڈ بینچ کی رپورٹ کے مطابق، راؤز ایونیو کورٹ کے اسپیشل جج (پی سی ایکٹ) وشال گوگنے نے کہا کہ منی لانڈرنگ ایکٹ (پی ایم ایل اے) کے تحت ای ڈی کی جانب سے دائر کی گئی شکایت قابلِ سماعت نہیں ہے، کیونکہ یہ معاملہ ایف آئی آر پر مبنی نہیں بلکہ ایک نجی شکایت کی بنیاد پر شروع کیا گیا تھا۔ عدالت نے اپنے فیصلے میں کہا کہ دفعہ 3 کے تحت بیان کردہ اور دفعہ 4 کے تحت قابلِ سزا منی لانڈرنگ کے جرم سے متعلق جانچ اور اس کے نتیجے میں دائر کی جانے والی استغاثہ شکایت اس وقت تک قابلِ سماعت نہیں ہو سکتی، جب تک ایف آئی آر درج نہ ہو یا ایکٹ کی شیڈول میں درج کسی جرم کا وجود نہ ہو۔

عدالت نے ای ڈی کو جانچ جاری رکھنے کی اجازت دی

عدالت نے یہ بھی فیصلہ دیا کہ اس مرحلے پر حزبِ اختلاف کے رہنما راہل گاندھی، کانگریس کی سابق صدر سونیا گاندھی اور دیگر ملزمان کو ایف آئی آر کی کاپی حاصل کرنے کا حق نہیں ہے۔ تاہم عدالت نے ای ڈی کو اس معاملے میں مزید جانچ جاری رکھنے کی اجازت دے دی ہے۔

ایڈووکیٹ شوریہ ویر سنگھ نے کیا کہا؟

ایڈووکیٹ شوریہ ویر سنگھ نے کہا کہ معزز عدالت نے منی لانڈرنگ کیس میں ملزمان کو بڑی راحت دی ہے، کیونکہ سبرامنیم سوامی نامی ایک نجی شکایت کنندہ نے سونیا جی، راہل جی اور دیگر افراد کے خلاف بے بنیاد شکایت درج کرائی تھی۔ عدالت نے ای ڈی کو بتایا ہے کہ یہ شکایت منی لانڈرنگ ایکٹ کی دفعہ 3 کے تحت ایک نجی شکایت کنندہ کی جانب سے دائر کی گئی تھی، جسے عدالت میں قابلِ قبول نہیں مانا جا سکتا۔ یہ قانون کے اصولوں کے خلاف ہے، کیونکہ ایف آئی آر درج ہونے سے پہلے عدالت میں مقدمہ نہیں چلایا جا سکتا۔

سبرامنیم سوامی نے درج کرائی تھی شکایت

نیشنل ہیرالڈ معاملہ سابق مرکزی وزیر سبرامنیم سوامی کی ایک نجی شکایت سے شروع ہوا تھا، جس میں انہوں نے سونیا گاندھی، راہل گاندھی، موتی لال ووہرا، آسکر فرنانڈیز، سُمن دوبے، سیم پٹروڈا اور گاندھی خاندان کے کنٹرول والی ینگ انڈین کمپنی پر دھوکہ دہی، مجرمانہ سازش اور جائیداد کے غلط استعمال کے الزامات عائد کیے تھے۔