نئی دہلی: میگھالیہ حکومت نے 2025 میں اپنے شوہر کے قتل کے الزام میں گرفتار سونم رگھوونشی کو ضمانت دیے جانے کے خلاف سپریم کورٹ سے رجوع کیا ہے۔ سالیسٹر جنرل تشار مہتا نے جمعرات کو جسٹس ایم ایم سندریش اور جسٹس شیل ناگو پر مشتمل بنچ کے سامنے مؤقف اختیار کیا کہ ہائی کورٹ نے مقدمے کی مرکزی ملزمہ کو ضمانت دے کر غلطی کی ہے۔ انہوں نے درخواست کی کہ اس معاملے کی فوری سماعت مقرر کی جائے۔

مہتا نے کہا کہ سونم کو اس بنیاد پر ضمانت دی گئی کہ گرفتاری کے وقت اسے اپنی گرفتاری کی وجوہات سے مکمل طور پر آگاہ نہیں کیا گیا تھا۔ انہوں نے کہا، ’’متعلقہ دستاویزات فراہم نہ کرنے کا معاملہ ایک ایسی قانونی دفعہ سے متعلق تھا جس کا ٹائپنگ کی غلطی کے باعث غلط حوالہ درج ہو گیا تھا۔‘‘ انہوں نے یہ بھی مؤقف اختیار کیا کہ ملزمہ کے فرار ہونے کا خدشہ موجود ہے۔

عدالت نے اس معاملے کی سماعت جمعہ کے روز مقرر کرنے پر اتفاق کیا۔ مدھیہ پردیش کے شہر اندور کی رہائشی سونم رگھوونشی کو گزشتہ سال جون میں اپنے تاجر شوہر راجا رگھوونشی کے قتل کے الزام میں گرفتار کیا گیا تھا۔ نوبیاہتا جوڑا سہاگ رات کے سفر (ہنی مون) کے لیے میگھالیہ آیا تھا اور گزشتہ سال 23 مئی کو سوہرا علاقے میں لاپتا ہو گیا تھا۔

بعد ازاں 2 جون 2025 کو راجا رگھوونشی کی لاش ایک گہری کھائی سے برآمد ہوئی تھی۔ پولیس کا الزام ہے کہ سونم رگھوونشی نے کرائے کے حملہ آوروں کے ساتھ مل کر اپنے شوہر کے قتل کی سازش رچی تھی۔ میگھالیہ ہائی کورٹ نے 29 جون کو سونم رگھوونشی کو ضمانت دینے کے ماتحت عدالت کے حکم کو برقرار رکھا تھا۔ ہائی کورٹ نے ریاستی حکومت کی اس درخواست کو بھی مسترد کر دیا تھا جس میں 27 اپریل کو نچلی عدالت کی جانب سے دی گئی ضمانت منسوخ کرنے کی استدعا کی گئی تھی۔