نئی دہلی: مرکزی کابینہ نے جمعہ کو 52,667 کروڑ روپے کے ایک بڑے ترقیاتی پیکیج کی منظوری دی ہے، جس میں تعلیم، ایل پی جی (LPG)، بنیادی ڈھانچے اور شمال مشرقی ریاستوں کی ترقی پر خصوصی زور دیا گیا ہے۔ مرکزی وزیر اطلاعات و نشریات اشونی ویشنو نے بتایا کہ تکنیکی تعلیمی اداروں کو مضبوط بنانے کے لیے 4,200 کروڑ روپے کی منظوری دی گئی ہے۔

کابینہ نے وزیراعظم اُجولا اسکیم کے تحت مالی سال 2025-26 کے لیے 12,060 کروڑ روپے کی سبسڈی کو بھی منظوری دی ہے۔ اشونی ویشنو نے کہا کہ یہ اسکیم عالمی سطح پر شمولیتی ترقی کی مثال سمجھی جاتی ہے اور اب تک 10.33 کروڑ اُجولا کنکشن دیے جا چکے ہیں۔ مرکزی کابینہ نے تیل کمپنیوں (او ایم سی) کو 30,000 کروڑ روپے کی ایل پی جی سبسڈی دی ہے تاکہ گھریلو گیس کی قیمتوں میں اضافہ نہ ہو۔

اشونی ویشنو کے مطابق عالمی سیاسی حالات کے باعث گیس کی قیمتوں میں اتار چڑھاؤ آتا ہے، اس لیے حکومت نے سبسڈی دے کر عوام کو ریلیف دینے کا فیصلہ کیا ہے۔ کابینہ نے شمال مشرقی ریاستوں آسام اور تریپورہ کی ترقی کے لیے 4,250 کروڑ روپے کے خصوصی پیکیج کو بھی منظوری دی ہے، تاکہ ان علاقوں کی بنیادی سہولیات بہتر کی جا سکیں۔

تعلیم کے میدان میں مرکزی کابینہ نے 175 انجینئرنگ کالجوں اور 100 پولی ٹیکنک اداروں سمیت 275 تکنیکی اداروں میں "ملٹی ڈسپلنری ایجوکیشن اینڈ ریسرچ امپروومنٹ" (MERIT) اسکیم کے نفاذ کی منظوری دی ہے۔ یہ مرکزی حکومت کی اسکیم ہے جس پر مالی سال 2025-26 سے 2029-30 تک کے لیے کل 4,200 کروڑ روپے خرچ کیے جائیں گے، جن میں سے 2,100 کروڑ روپے ورلڈ بینک سے قرض کے طور پر حاصل ہوں گے۔

مرکزی کابینہ نے جنوبی ہندوستان میں مرکنم–پونڈیچیری فور-لین ہائی وے کی تعمیر و ترقی کے لیے 2,157 کروڑ روپے کی منظوری بھی دی ہے۔ بی پی سی ایل، آئی او سی ایل اور ایچ پی سی ایل جیسی تیل کمپنیوں کو ایل پی جی کے شعبے میں ہوئے نقصانات کی تلافی کے لیے 30,000 کروڑ روپے کی مدد دی جائے گی۔