کوچی: کیرالہ ہائی کورٹ نے ایک مقدمے کی سماعت کے دوران ایک اہم تبصرہ کرتے ہوئے کہا ہے کہ بغیر کسی ٹھوس بنیاد کے کسی خاتون کے کردار پر کیچڑ اچھالنا سماجی تشدد کی ایک خطرناک شکل ہے۔ عدالت نے یہ بھی کہا کہ جب کوئی معاشرہ کسی عورت کی کامیابیوں کے بجائے اس کے کردار پر زیادہ توجہ دیتا ہے تو یہ اس کی فکری کمزوری کو ظاہر کرتا ہے۔

عدالت نے ملیالم فلم اداکارہ شویتا مینن کے خلاف درج ایف آئی آر کو خارج کرتے ہوئے یہ ریمارکس دیے۔ شویتا مینن پر الزام تھا کہ انہوں نے اپنی کچھ پرانی فلموں اور اشتہارات کے مبینہ فحش مناظر کی اشاعت یا نشریات کی تھیں۔ تاہم جسٹس سی ایس ڈیاس اداکارہ کے اس مؤقف سے متفق تھے کہ یہ شکایت انہیں انتخاب لڑنے سے روکنے کے لیے درج کی گئی تھی۔

ہائی کورٹ نے کہا کہ شویتا مینن کا یہ دعویٰ قابلِ اعتبار ہے کہ یہ شکایت انہیں "ایسوسی ایشن آف ملیالم مووی آرٹسٹس" کے صدر کے عہدے کے انتخاب میں حصہ لینے سے روکنے کے لیے درج کی گئی، اور وہ بھی نامزدگی واپس لینے کی آخری تاریخ سے عین پہلے۔ شویتا مینن نے اس شکایت کو کالعدم قرار دینے کے لیے عدالت سے رجوع کیا تھا۔

عدالت نے ان کی درخواست منظور کرتے ہوئے کہا: "شکایت درج کرانے کا وقت واضح طور پر اس کے بدنیتی پر مبنی اور ہراسانی کے مقصد کی نشاندہی کرتا ہے۔" عدالت نے مزید کہا کہ شکایت، ایف آئی آر، دستیاب ریکارڈ اور متعلقہ قوانین کے جائزے سے یہ ظاہر ہوتا ہے کہ الزامات اداکارہ کی ساکھ اور شہرت کو نقصان پہنچانے کے بدنیتی پر مبنی ارادے سے لگائے گئے تھے۔

۔ 11 مارچ کے اپنے حکم میں عدالت نے کہا: "کسی خاتون کے کردار کو بغیر کسی ثبوت کے بدنام کرنا سماجی تشدد کی ایک خطرناک شکل ہے، کیونکہ ایسی باتیں کہنا آسان ہوتا ہے لیکن ان کے اثرات دیرپا ہوتے ہیں۔" ہائی کورٹ نے یہ بھی واضح کیا کہ خواتین کو بااختیار بنانے کا مطلب انہیں مثالی یا بے عیب بنا دینا نہیں ہے، بلکہ ان کی ذاتی شناخت، خواہشات اور کامیابیوں کو عزت اور انصاف کے ساتھ تسلیم کرنا ہے۔

عدالت نے گزشتہ سال اگست میں اس ایف آئی آر سے متعلق کارروائی پر بھی روک لگا دی تھی اور کہا تھا کہ ابتدائی طور پر ایسا لگتا ہے کہ اداکارہ کا مؤقف درست ہے کہ شکایت کو تفتیش کے لیے بھیجنے سے پہلے پولیس سے رپورٹ طلب کرنے اور ضروری جانچ کے تقاضے پورے نہیں کیے گئے تھے۔ اداکارہ کے خلاف انفارمیشن ٹیکنالوجی (آئی ٹی) ایکٹ کی دفعہ 67 (الیکٹرانک شکل میں فحش مواد کی اشاعت یا ترسیل) اور غیر اخلاقی تجارت (انسداد) ایکٹ کی متعلقہ دفعات کے تحت ایف آئی آر درج کی گئی تھی۔ جب یہ مقدمہ درج ہوا، اس وقت وہ ملیالم مووی آرٹسٹس ایسوسی ایشن (AMMA) کے صدر کے عہدے کے لیے انتخابی دوڑ میں شامل تھیں، اور بعد میں وہ اسی عہدے پر منتخب بھی ہوئیں۔