کلکتہ: مغربی بنگال میں ووٹر لسٹ کی خصوصی جامع نظرِ ثانی (ایس آئی آر) کے عمل کے دوران نوبیل انعام یافتہ ماہرِ معاشیات امرتیہ سین کا نام سامنے آنے کے بعد یہ معاملہ بحث کا موضوع بن گیا ہے۔ جمعہ کے روز الیکشن کمیشن کے افسران بیر بھوم ضلع کے بولپور میں واقع ان کے آبائی گھر ’’پرتیچی‘‘ پہنچے اور ضروری دستاویزات حاصل کیں۔

یہ کارروائی ایس آئی آر کے تحت کی گئی، جسے کمیشن نے معمول کا عمل قرار دیا ہے۔ الیکشن حکام نے امرتیہ سین کا آدھار کارڈ، ووٹر شناختی کارڈ نمبر، ان کی والدہ امیتا سین کا انتقالی سرٹیفکیٹ، اور وہ اجازت نامہ حاصل کیا جس کے ذریعے امرتیہ سین نے اپنے چچا زاد بھائی شانتبھانو سین کو سماعت کے دوران اپنی نمائندگی کی اجازت دی ہے۔

امرتیہ سین اس وقت امریکہ میں مقیم ہیں اور ہارورڈ یونیورسٹی میں معاشیات اور فلسفہ کے پروفیسر ہیں۔ خاندان کے ایک فرد کے مطابق، حکام نے تمام ضروری کاغذات جمع کر لیے ہیں۔ ریاستی چیف الیکٹورل آفیسر کے دفتر کے مطابق، امرتیہ سین کے اینیومریشن فارم میں ایک تکنیکی تضاد پایا گیا تھا۔

فارم میں ان کا نام ان کی والدہ امیتا سین سے منسلک کیا گیا تھا، جبکہ دونوں کی عمروں میں 15 سال سے کم کا فرق ظاہر ہو رہا تھا۔ اسی تکنیکی خامی کی وجہ سے ای آر او نیٹ پورٹل پر یہ معاملہ فلیگ ہوا اور سماعت کے لیے نوٹس جاری کیا گیا۔

چیف الیکٹورل آفیسر کے دفتر نے کہا کہ یہ نوٹس دیگر اسی نوعیت کے معاملات کی طرح ہی جاری کیا گیا ہے۔ چونکہ امرتیہ سین کی عمر 85 برس سے زیادہ ہے، اس لیے ای آر او، اے ای آر او اور بی ایل او نے خود ان کے گھر جا کر تمام رسمی کارروائیاں مکمل کیں۔ کمیشن نے یہ بھی واضح کیا کہ یہ عمل قواعد کے مطابق اور معمول کے طریقۂ کار کے تحت انجام دیا گیا۔