لکھنؤ/ آواز دی وائس

سرکاری اعداد و شمار کے مطابق، اتر پردیش میں خصوصی گہری نظرثانی (اسپیشل انٹینسو ریویژن ایس آئی آر) کے دوران جن ووٹروں کے فارم جمع نہیں ہو سکے، اُن کے تناسب کے لحاظ سے لکھنؤ، غازی آباد، بلرام پور اور کانپور نگر سرفہرست اضلاع میں شامل ہیں۔

ریاست کے بندیل کھنڈ خطے کے اضلاع جیسے للت پور، ہمیر پور، مہوبا، جھانسی اور چترکوٹ میں مسودہ فہرست سے اخراج (ریموول) کی تعداد سب سے کم رہی۔ایس آئی آر کے بعد منگل کو شائع ہونے والی مسودہ انتخابی فہرست میں 12.55 کروڑ ووٹروں کو برقرار رکھا گیا ہے، جبکہ 2.89 کروڑ ووٹروں کو خارج کیا گیا ہے۔ اتر پردیش کے چیف الیکٹورل آفیسر نو دیپ رِنوا کے مطابق، پہلے درج 15.44 کروڑ ووٹروں میں سے 2.89 کروڑ (یعنی 18.70 فیصد) کو اموات، مستقل نقل مکانی یا متعدد اندراجات کی وجہ سے مسودہ فہرست میں شامل نہیں کیا جا سکا۔

۔6 جنوری کو ضلع وار شائع ہونے والے مسودہ ڈیٹا کے مطابق، لکھنؤ میں سب سے زیادہ 30.04 فیصد فارم جمع نہیں ہو سکے، جو تقریباً 12 لاکھ ووٹروں سے متعلق ہے۔ لکھنؤ میں ووٹروں کی تعداد اکتوبر 2025 میں 39.94 لاکھ سے گھٹ کر نظرثانی شدہ مسودہ میں 27.94 لاکھ رہ گئی۔ غیر جمع شدہ زمروں میں 1.28 لاکھ اموات سے متعلق کیسز، 4.28 لاکھ ایسے ووٹر جو ناقابلِ سراغ یا غیر حاضر پائے گئے، اور 5.36 لاکھ مستقل طور پر منتقل ہونے کے کیسز شامل ہیں، علاوہ ازیں دیگر زمروں کے معاملات بھی تھے۔

غازی آباد 28.83 فیصد غیر جمع شدہ فارموں کے ساتھ دوسرے نمبر پر رہا، جس میں تقریباً 5.83 لاکھ ووٹر شامل ہیں۔ ضلع میں کل ووٹرز کی تعداد 28.38 لاکھ سے کم ہو کر 20.20 لاکھ رہ گئی۔ غیر جمع شدہ فارموں میں سے لگ بھگ 64 ہزار اموات، 3.20 لاکھ ناقابلِ سراغ یا غیر حاضر ووٹرز، اور 3.60 لاکھ مستقل منتقلی سے متعلق تھے۔بلرام پور 25.98 فیصد غیر جمع شدہ فارموں کے ساتھ تیسرے نمبر پر رہا، جو تقریباً 4.11 لاکھ ووٹروں پر مشتمل ہے۔ ضلع میں ووٹرز کی تعداد 15.83 لاکھ سے گھٹ کر 11.18 لاکھ رہ گئی۔ تفصیل کے مطابق تقریباً 63 ہزار اموات، 1.60 لاکھ ناقابلِ سراغ یا غیر حاضر ووٹرز اور 1.33 لاکھ مستقل منتقلی کے کیسز تھے۔

کانپور نگر میں 25.50 فیصد غیر جمع شدہ فارم ریکارڈ ہوئے، جن میں تقریباً 9.02 لاکھ ووٹر شامل ہیں۔ یہاں ووٹرز کی تعداد 35.38 لاکھ سے کم ہو کر 26.36 لاکھ رہ گئی۔ اعداد و شمار میں تقریباً 1.04 لاکھ اموات، 3.10 لاکھ ناقابلِ سراغ یا غیر حاضر ووٹرز اور 3.92 لاکھ مستقل منتقلی کے کیسز شامل ہیں۔

الہ آباد (پریاگ راج) اگلے نمبر پر رہا، جہاں 24.64 فیصد غیر جمع شدہ فارم سامنے آئے، جو تقریباً 11.56 لاکھ ووٹروں کے برابر ہیں۔ ضلع میں ووٹرز کی تعداد 46.93 لاکھ سے گھٹ کر 35.37 لاکھ رہ گئی۔ ان میں تقریباً 1.74 لاکھ اموات، 3.67 لاکھ ناقابلِ سراغ یا غیر حاضر ووٹرز اور 4.89 لاکھ مستقل منتقلی کے کیسز شامل تھے۔ گوتم بدھ نگر آٹھ اضلاع میں ساتویں نمبر پر رہا، جہاں 23.98 فیصد غیر جمع شدہ فارم (تقریباً 4.47 لاکھ ووٹر) ریکارڈ ہوئے۔ نظرثانی شدہ مسودہ میں ضلع کی کل ووٹر تعداد تقریباً 18.65 لاکھ رہی، اور غیر جمع شدہ فارموں میں اموات، نقل مکانی اور دہری اندراجات سے متعلق کیسز شامل تھے۔

آگرہ آٹھواں ضلع رہا، جہاں 23.25 فیصد غیر جمع شدہ فارم سامنے آئے، جو تقریباً 8.37 لاکھ ووٹروں پر مشتمل ہیں۔ ضلع میں ووٹرز کی تعداد 36.00 لاکھ سے کم ہو کر 27.63 لاکھ رہ گئی۔ غیر جمع شدہ زمروں میں اموات، ناقابلِ سراغ ووٹرز اور مستقل طور پر منتقل ہو چکے افراد شامل ہیں۔

اتر پردیش کے دیگر اہم اضلاع میں وارانسی میں ایس آئی آر کے دوران 18.18 فیصد فارم جمع نہیں ہو سکے، گورکھپور میں 17.61 فیصد، رائے بریلی میں 16.35 فیصد، امیٹھی میں 18.60 فیصد، اٹاوہ میں 18.95 فیصد، قنوج میں 21.57 فیصد، سہارنپور میں 16.37 فیصد، مظفر نگر میں 16.29 فیصد، علی گڑھ میں 18.60 فیصد اور متھرا میں 19.19 فیصد غیر جمع شدہ فارم ریکارڈ ہوئے۔

فہرست میں سب سے نیچے للت پور رہا، جہاں صرف 9.95 فیصد فارم جمع نہیں ہو سکے۔ اس کے بعد ہمیر پور (0.78 فیصد)، مہوبا (12.42 فیصد)، باندا (13 فیصد)، چترکوٹ (13.67 فیصد) اور جھانسی (13.92 فیصد) شامل ہیں۔

چیف الیکٹورل آفیسر نو دیپ رِنوا نے بدھ کو پی ٹی آئی کو بتایا کہ یہ اعداد و شمار مسودہ انتخابی فہرست پر مبنی ہیں اور 6 فروری تک دعوؤں اور اعتراضات کے عمل کی تکمیل کے بعد نظرثانی کے تابع ہوں گے، جس کے بعد 6 مارچ کو حتمی فہرست شائع کی جائے گی۔