نئی دہلی: سپریم کورٹ نے منگل کو مغربی بنگال حکومت اور انتخابی کمیشن کو ہدایت دی کہ وہ ریاست میں ووٹر لسٹ کے خصوصی گہرائی سے جائزہ (Special Intensive Revision – ایس آئی آر) میں تعینات عدالتی حکام کو ہر طرح کی معاونت فراہم کریں۔

چیف جسٹس سوریا کنت، جسٹس اے آر مہادیوان اور جسٹس جوی ملیا باغچی کی بنچ نے کہا کہ ایس آئی آر عمل میں تعینات عدالتی حکام نے اب تک ووٹر لسٹ سے نام ہٹانے کے 10.16 لاکھ اعتراضات اور دعوؤں کی سماعت کی ہے۔ بنچ نے انتخابی کمیشن کو ہدایت دی کہ کولکاتا ہائی کورٹ کے چیف جسٹس کی منظوری کے بغیر ایس آئی آر کے عمل میں کوئی بھی ایسا لازمی اقدام نہ اٹھایا جائے جو عمل کو متاثر کرے۔

بنچ نے کہا کہ کمیشن کے پورٹل میں تکنیکی خلل کی جانچ کی جائے اور اس بات کو یقینی بنایا جائے کہ ایسی کوئی رکاوٹ پیدا نہ ہو۔ بنچ نے کہا کہ عدالتی حکام کے لیے نئے ‘لاگ ان آئی ڈی’ جلد سے جلد بنائے جائیں، تاکہ ووٹر لسٹ میں ترامیم کے عمل کو ہموار بنایا جا سکے۔ اس نے یہ بھی کہا کہ عدالتی حکام کے فیصلوں کا جائزہ انتخابی کمیشن کے کسی بھی انتظامی افسر کے ذریعہ نہیں لیا جا سکتا۔

سپریم کورٹ نے کہا کہ کولکاتا ہائی کورٹ کے چیف جسٹس سابق چیف جسٹس اور ہائی کورٹ کے ججز کی بنچ تشکیل دے سکتے ہیں تاکہ اپیلوں کی سماعت کی جا سکے، اور انتخابی کمیشن کو ایس آئی آر عمل میں عدالتی حکام کے فیصلوں کے خلاف اپیلوں کی سماعت کے لیے ایک اپیلیٹ ادارہ قائم کرنے کے لیے نوٹیفکیشن جاری کرنے کی ہدایت دی۔ بنچ ریاست میں جاری ایس آئی آر عمل سے متعلق کئی درخواستوں کی سماعت کر رہی تھی۔