نئی دہلی:سپریم کورٹ نے منگل کے روز بہار میں خصوصی گہری نظر ثانی (ایس آئی آر) کے عمل کو انجام دینے کے انتخابی کمیشن کے فیصلے کو چیلنج کرنے والی درخواستوں پر سماعت کی۔ جسٹس سوریہ کانت اور جسٹس جئے مالیا باگچی پر مشتمل بنچ نے راشٹریہ جنتا دل (آر جے ڈی) کے رہنما منوج جھا کی جانب سے سینئر وکیل کپل سبل کے دلائل سے سماعت کا آغاز کیا۔

سبل نے دلیل دی کہ ایک انتخابی حلقے میں انتخابی کمیشن نے دعویٰ کیا کہ 12 لوگ فوت ہو چکے ہیں، مگر وہ زندہ پائے گئے، جب کہ ایک اور معاملے میں زندہ افراد کو مردہ قرار دے دیا گیا۔ انتخابی کمیشن کی جانب سے پیش ہونے والے سینئر وکیل راکیش دویدی نے کہا کہ اس قسم کی مہم میں کچھ خامیاں ہونا فطری ہے۔ مردہ افراد کو زندہ قرار دینا یا زندہ افراد کو مردہ قرار دینا، یہ سب درست کیا جا سکتا ہے کیونکہ یہ صرف ایک مسودہ فہرست ہے۔

بنچ نے انتخابی کمیشن سے کہا کہ وہ حقائق اور اعداد و شمار کے ساتھ تیار رہے کیونکہ عدالت عمل سے قبل ووٹروں کی تعداد، پہلے اور اب کے مردہ افراد کی تعداد اور دیگر متعلقہ تفصیلات پر سوال کرے گی۔ اس سے پہلے 29 جولائی کو، انتخابی کمیشن کو ایک آئینی اتھارٹی قرار دیتے ہوئے، عدالت نے کہا تھا کہ اگر بہار میں ووٹر لسٹ کی SIR میں بڑے پیمانے پر نام حذف کیے گئے ہیں تو وہ فوراً مداخلت کرے گی۔

مسودہ فہرست یکم اگست کو شائع ہوئی تھی اور حتمی فہرست 30 ستمبر کو شائع کی جانی ہے۔بہار میں ووٹر لسٹ کے خصوصی گہری جانچ و تجدید (SIR) کو لے کر منگل (12 اگست 2025) کی سماعت کے دوران سپریم کورٹ نے کہا کہ آدھار کارڈ کو حتمی ثبوت نہ ماننے کی الیکشن کمیشن کی بات درست ہے۔ عدالت نے کہا کہ آدھار ایکٹ میں بھی اسے ثبوت نہیں مانا گیا ہے۔

عدالت نے یہ بات درخواست گزاروں کی ان دلیلوں پر کہی، جن میں بتایا گیا کہ آدھار کارڈ کو ایس آئی آر میں قبول نہیں کیا جا رہا ہے۔ درخواست گزاروں کی جانب سے کپل سبل، پرشانت بھوشن، ابھیشیک منو سنگھوی اور گوپال شنکر نرائن جیسے سینیئر وکلاء پیش ہوئے، جنہوں نے ایس آئی آر کے عمل میں گڑبڑی ہونے کا دعویٰ کیا۔ کپل سبل کا کہنا تھا کہ کسی کا مقامی باشندہ ہونا اور 18 سال کا ہونا کافی ہونا چاہیے۔

اس پر عدالت نے کہا کہ خاندان کا رجسٹر، پنشن کارڈ، ذات کا سرٹیفکیٹ جیسے کئی دستاویزات ہیں جن سے مقامی باشندہ ہونے کا پتا چل سکتا ہے۔ عدالت نے کہا کہ 2003 ایس آئی آر والے لوگوں سے بھی فارم بھروائے جا رہے ہیں۔ 7.89 کروڑ میں سے 7.24 کروڑ نے فارم بھرا ہے۔ کپل سبل نے ایس آئی آر پر سوال اٹھاتے ہوئے کہا کہ 22 لاکھ کو مردہ قرار دیا جا رہا ہے، 36 لاکھ کو مستقل طور پر علاقے سے جا چکا بتایا جا رہا ہے، لیکن فہرست نہیں دی جا رہی۔

پرشانت بھوشن نے بھی کہا کہ فہرست نہیں دی جا رہی ہے، جس پر الیکشن کمیشن کے وکیل راکیش دویدی نے عدالت کو بتایا کہ تمام سیاسی جماعتوں کے بوتھ لیول ایجنٹ کو فہرست دی گئی ہے۔ اس پر پرشانت بھوشن نے سوال کیا کہ صرف سیاسی جماعتوں کو کیوں، سب کو کیوں نہیں دی جا رہی۔

کپل سبل نے عدالت میں یہ بھی سوال اٹھایا کہ جنوری 2025 میں آئی فہرست کے 7.24 لاکھ لوگوں کو ایس آئی آر میں مردہ دکھایا جا رہا ہے۔ اس دلیل پر عدالت نے کہا کہ ایس آئی آر کا مقصد ہی یہ ہے کہ ان غلطیوں کو درست کیا جا سکے۔ درخواست گزاروں نے یہ بھی سوال اٹھایا ہے کہ بوتھ لیول افسر لاکھوں لوگوں کی تصدیق ایک مہینے میں کیسے کر سکتا ہے۔ اپوزیشن کا دعویٰ ہے کہ جاری عمل کروڑوں اہل شہریوں کو ان کے ووٹ کے حق سے محروم کر دے گا۔

آر جے ڈی کے رکن پارلیمان منوج جھا اور ترنمول کانگریس کی رکن مہوا موئترا کے علاوہ کانگریس کے کے سی وینوگوپال، شرد پوار گروپ کی سپریا سولے، کمیونسٹ پارٹی آف انڈیا کے ڈی۔ راجہ، سماج وادی پارٹی کے ہرندر سنگھ ملک، شیو سینا (ادھو ٹھاکرے) کے اروند ساونت، جھارکھنڈ مکتی مورچہ کے سرفراز احمد اور سی پی آئی (ایم ایل) کے دیپانکر بھٹاچاریہ نے مشترکہ طور پر انتخابی کمیشن کے 24 جون کے فیصلے کو چیلنج کرتے ہوئے عدالتِ عظمیٰ سے رجوع کیا ہے۔ پی یو سی ایل، این جی او "ایسوسی ایشن آف ڈیموکریٹک ریفارمز" جیسے کئی دیگر شہری تنظیمیں اور کارکن یوگندر یادو بھی انتخابی کمیشن کے حکم کے خلاف عدالتِ عظمیٰ پہنچے ہیں۔