نئی دہلی: راجیہ سبھا سکریٹریٹ نے تصدیق کی ہے کہ اتر پردیش کے الہ آباد ہائی کورٹ کے جج شیکھر یادو کو ان کے نفرت انگیز تقریر کے سبب عہدے سے ہٹانے کے نوٹس پر دستخط کرنے والے 55 ارکان میں سے 44 ارکان کے دستخط کی تصدیق ہو چکی ہے، جبکہ کپِل سبل اور دیگر نو ارکان نے اب تک اپنے دستخطوں کی تصدیق نہیں کرائی ہے۔

سبل اس نوٹس پر فوری کارروائی کے لیے پرزور رہے ہیں۔ انہوں نے دعویٰ کیا کہ راجیہ سبھا سکریٹریٹ سے انہیں ایسا کوئی ای میل نہیں ملا جس میں اس بات کی تصدیق کی گئی ہو کہ گزشتہ چھ مہینوں میں ان کے آفیشل ای میل پر تین بار نوٹس بھیجا گیا ہو۔ سببل نے دستخطوں کی تصدیق کی ضرورت اور مارچ میں کارروائی میں تاخیر پر بھی سوال اٹھایا۔ انہوں نے کہا کہ اس سلسلے میں نوٹس 13 دسمبر 2024 کو پیش کیا گیا تھا۔

شیکھر یادو کو ہٹانے کے لیے 55 ارکان نے نوٹس پر دستخط کیے تھے، مگر ان میں سے ایک رکن، سرفراز احمد کے دستخط نوٹس پر دو بار دکھائی دے رہے ہیں۔ راجیہ سبھا سکریٹریٹ اس بات کی تحقیقات کر رہا ہے کہ ان کے دستخط دو بار کیسے دکھائی دے رہے ہیں اور آیا وہ جعلسازی کے ہیں یا نہیں۔

ذرائع نے بتایا کہ جھارکھنڈ سے جھارکھنڈ مکتی مورچہ (جے ایم ایم) کے رکن پارلیمنٹ سرفراز احمد اس مسئلے پر پہلے ہی راجیہ سبھا کے چیئرمین جگدیپ دھنکھڑ سے ملاقات کر چکے ہیں اور اس بات کی تصدیق کی ہے کہ انہوں نے دو بار نہیں بلکہ صرف ایک بار دستخط کیے ہیں۔ آئین کے مطابق اعلیٰ عدلیہ کے کسی جج کو خدمات سے تب ہی ہٹایا جا سکتا ہے جب پارلیمنٹ کے دونوں ایوانوں میں موجود ارکان کے دو تہائی اکثریتی ووٹ سے تجویز منظور ہو۔

اس کے بعد صدر کو اسے منظور کرنا ہوتا ہے۔ راجیہ سبھا میں ایسا نوٹس تب لایا جا سکتا ہے جب 50 ارکان کے دستخط ہوں، جبکہ لوک سبھا میں اس کے لیے 100 ارکان کے دستخط کی ضرورت ہوتی ہے۔ سابق مرکزی وزیر اور اب آزاد راجیہ سبھا رکن سبل نے کہا کہ گزشتہ چھ مہینوں میں تین بار یاد دہانی کے باوجود انہوں نے اب تک راجیہ سبھا سکریٹریٹ کے سامنے اپنے دستخطوں کی تصدیق نہیں کرائی ہے۔

سبل نے ’پی ٹی آئی-بھاشا‘ سے بات کرتے ہوئے کہا، میں نے چیئرمین دھنکھڑ سے بار بار ملاقات کی ہے، لیکن انہوں نے جج شیکھر یادو کو ہٹانے کے نوٹس پر میرے دستخطوں کی تصدیق کا مسئلہ کبھی نہیں اٹھایا، حالانکہ پورے عمل کا آغاز اور پیشکار میں ہی تھا۔ انہوں نے یہ بھی کہا کہ دستخطوں کی تصدیق صرف اس صورت میں ضروری ہوتی ہے جب نوٹس پر کیے گئے دستخطوں پر سوال اٹھایا گیا ہو۔

سبل نے اس تاخیر پر بھی سوال اٹھایا اور کہا کہ چیئرمین کو نوٹس کو قبول یا مسترد کرنا چاہیے اور اس عمل میں تاخیر نہیں کرنی چاہیے۔ ذرائع کے مطابق جن ارکان نے اب تک اپنے دستخط کی تصدیق نہیں کرائی ہے اور جو راجیہ سبھا سکریٹریٹ کے ای میل سوالات کا جواب نہیں دے رہے ہیں، ان میں عام آدمی پارٹی (آپ) کے رگھوو چڈھا اور سنجیو ارورا، ترنمول کانگریس کی سشمیتا دیو، کیرالہ سے کانگریس کے رکن جوس کے مانی، اجیت کمار بھوئیاں، جی سی چندر شیکھر اور فیاض احمد شامل ہیں۔

راجیہ سبھا کے چیئرمین دھنکھڑ نے گزشتہ سیشن کے دوران اس مسئلے پر بات کی تھی اور تصدیق کی تھی کہ ارکان کے دستخطوں کی تصدیق کی جا رہی ہے اور یہ عمل جاری ہے۔ دھنکھڑ نے 21 مارچ 2025 کو ایوان میں کہا تھا، میں نے تمام طریقہ کار کے اقدامات کیے ہیں، لیکن میں آپ کے ساتھ ایک تشویش شیئر کرنا چاہتا ہوں جس نے میری توجہ مبذول کی ہے۔ 55 ارکان میں سے جنہوں نے اس درخواست پر دستخط کیے ہیں، ایک رکن کے دستخط دو بار نظر آتے ہیں اور متعلقہ رکن نے اپنے دستخط سے انکار کیا ہے۔

راجیہ سبھا کے ذرائع نے بتایا کہ جج شیکھر یادو کو ہٹانے کے نوٹس کے سلسلے میں آداب کمیٹی اور خصوصی اختیارات کمیٹی کی جانب سے کسی بھی قسم کی مجرمانہ تحقیقات کی جا سکتی ہے، کیونکہ دستاویز پر جعلی دستخط ہو سکتے ہیں۔