نئی دہلی / آواز دی وائس
بین الاقوامی خلائی اسٹیشن (آئی ایس ایس) کے کامیاب مشن کے بعد، ہندوستانی خلا باز شبھانشو شکلا نے جمعرات کو وزیرِ دفاع راجناتھ سنگھ سے ملاقات کی اور اس دوران اپنی خلائی یاترا، مدار میں کیے گئے اہم تجربات اور ہندوستان کے اولین انسانی خلائی پرواز پروگرام ’گگن یان‘ پر گفتگو کی۔
ایک سینئر افسر نے بتایا کہ یہ ملاقات نئی دہلی کے ساوتھ بلاک میں ہوئی۔ راجناتھ سنگھ نے کہا کہ گروپ کیپٹن شکلا کی خلائی یاترا ہندوستان کے نوجوانوں کو متاثر کرے گی۔
وزیرِ دفاع نے ’ایکس‘ پر ایک پوسٹ میں لکھا كہ بین الاقوامی خلائی اسٹیشن پر ہندوستانی خلا باز گروپ کیپٹن شبھانشو شکلا سے مل کر مسرت ہوئی۔ ہم نے ان کی متاثر کن خلائی یاترا، مدار میں ان کے ذریعے کیے گئے اہم تجربات، سائنس و ٹیکنالوجی میں پیش رفت اور ہندوستان کے اولین ’گگن یان‘ مشن کے ساتھ آگے کی راہ پر گفتگو کی۔ ان کی یاترا ہندوستان کے نوجوانوں کے لیے تحریک ثابت ہوگی۔ قوم کو ان کی کامیابیوں پر فخر ہے۔
وزیرِ دفاع نے ملاقات کی کچھ تصاویر بھی شیئر کیں۔
شبھانشو شکلا نے جمعرات کو یہاں منعقدہ ایک پریس کانفرنس میں، حالیہ ’ایکسئوم-4‘ مشن کا حصہ ہونے کے اپنے تجربات اور ہندوستان کے خلائی پروگرام کے بارے میں اپنے وژن کو شیئر کیا۔
انہوں نے کہا کہ آئی ایس ایس مشن کا تجربہ ہندوستان کے انسانی خلائی پرواز پروگرام کے لیے نہایت کارآمد ہوگا اور پچھلے برس اپنے مشن کے دوران انہوں نے بے حد قیمتی سیکھ حاصل کی۔
