نئی دہلی

رکنِ پارلیمنٹ ششی تھرور نے مغربی ایشیا میں جاری جنگ کے حوالے سے مودی حکومت کی حکمتِ عملی کا دفاع کیا ہے۔ انہوں نے زور دے کر کہا کہ حکومت کی خاموشی اس کی کمزوری نہیں بلکہ ایک ذمہ دارانہ حکمتِ عملی ہے۔

 ششی تھرور نے کہا کہ جو لوگ اس وقت مغربی ایشیا کی جنگ میں حکومت کی خاموشی کو بزدلی قرار دے رہے ہیں، وہ سفارت کاری کی پیچیدگیوں کو سمجھنے سے قاصر ہیں۔ششی تھرور کے مطابق اس مشکل وقت میں تمام طاقتوں کے ساتھ توازن برقرار رکھنا نہایت ضروری ہو گیا ہے۔ ان کا کہنا ہے کہ اگر بین الاقوامی قانون پر نظر ڈالی جائے تو کوئی بھی اس جنگ کو درست نہیں ٹھہرا سکتا، کیونکہ یہ خودمختاری اور پُرامن حل کے اصولوں کے خلاف ہے، جن کے لیے ہندوستان کئی دہائیوں سے کھڑا رہا ہے۔

خارجہ پالیسی پر تھرور کا موقف

انہوں نے مزید لکھا کہ کسی بھی ملک کی خارجہ پالیسی کوئی تعلیمی سیمینار کی طرح نہیں ہوتی جہاں صرف اصولوں پر بحث کی جائے۔ ششی تھرور نے اپنے مضمون میں چند تاریخی واقعات کا حوالہ بھی دیا اور کہا کہ ہندوستان نے ماضی میں بھی کئی مواقع پر قومی مفاد کو اصولوں پر ترجیح دی ہے۔

انہوں نے 1956 کے ہنگری بحران، 1968 میں چیکوسلوواکیہ میں سوویت مداخلت اور 1979 میں افغانستان پر سوویت حملے کی مثال دی۔ ان معاملات میں ہندوستان نے کھل کر تنقید نہیں کی تھی، کیونکہ اس وقت سوویت یونین ہندوستان کا سب سے بڑا اسلحہ فراہم کرنے والا اور اہم تزویراتی شراکت دار تھا۔ ایسے میں کھل کر نہ بولنا بھی ایک حکمتِ عملی کا حصہ تھا۔ اسی طرح یوکرین جنگ اور ایران سے جڑے موجودہ حالات میں بھی ایسی ہی حکمتِ عملی نظر آ رہی ہے۔

سونیا گاندھی کا ردِعمل

ششی تھرور کے یہ بیانات ایسے وقت میں سامنے آئے ہیں جب کانگریس کی رہنما سونیا گاندھی نے اسی معاملے پر حکومت کو نشانہ بنایا ہے۔ انہوں نے کہا تھا کہ اس معاملے پر حکومت کی خاموشی حیران کن ہے۔ ان کا کہنا تھا کہ جب کسی غیر ملکی رہنما کے قتل جیسے معاملات میں ہندوستان خودمختاری اور بین الاقوامی قانون کا کھل کر دفاع نہیں کرتا اور غیر جانبداری سے پیچھے ہٹتا ہے، تو حکومت کی خارجہ پالیسی پر سوال اٹھتے ہیں۔