نئی دہلی: اتار چڑھاؤ بھرے کاروبار کے دوران منگل کے روز مقامی شیئر بازاروں میں گراوٹ دیکھی گئی اور بی ایس ای سینسیکس 479 پوائنٹس ٹوٹ گیا، جبکہ این ایس ای نفٹی میں 118 پوائنٹس کی کمی درج کی گئی۔ ایران کے جنوبی حصے میں امریکی حملے کی خبروں کے بعد خام تیل کی قیمتوں میں اضافے کے سبب بازار میں مندی آئی۔

بی ایس ای کا 30 حصص پر مشتمل معیاری اشاریہ سینسیکس 479.26 پوائنٹس یعنی 0.63 فیصد گر کر 76,009.70 پر بند ہوا۔ کاروبار کے دوران ایک وقت یہ 579.28 پوائنٹس یعنی 0.75 فیصد کی گراوٹ کے ساتھ 75,909.68 تک پہنچ گیا تھا۔ اسی طرح، این ایس ای کا 50 حصص پر مشتمل معیاری اشاریہ نفٹی 118 پوائنٹس یعنی 0.49 فیصد کی کمی کے ساتھ 23,913.70 پر بند ہوا۔ سینسیکس میں شامل کمپنیوں میں بھارتی ایئرٹیل، ٹرینٹ، ٹاٹا کنسلٹنسی سروسز، بجاج فائنانس، ٹائٹن اور ایچ ڈی ایف سی بینک کے حصص میں نمایاں گراوٹ دیکھی گئی۔ دوسری جانب فائدے میں رہنے والے حصص میں ٹیک مہندرا، ایٹرنل، ماروتی اور اڈانی پورٹس شامل رہے۔

عالمی تیل معیار برینٹ کروڈ 2.93 فیصد بڑھ کر 98.96 ڈالر فی بیرل تک پہنچ گیا۔ امریکی صدر ڈونالڈ ٹرمپ نے پیر کے روز کہا کہ ایران کے ساتھ جنگ ختم کرنے کے لیے بات چیت ’’اچھی طرح‘‘ آگے بڑھ رہی ہے، لیکن حکام کے مطابق تہران کی جانب سے اپنے سپریم لیڈر سے مشاورت کے لیے استعمال کیے جانے والے پیچیدہ مواصلاتی نظام کے باعث حتمی فیصلہ آنے میں کچھ وقت لگ سکتا ہے۔

لائیولانگ ویلتھ کے ریسرچ تجزیہ کار اور بانی ہری پرساد کے نے کہا، ’’خام تیل کی قیمتوں میں نرمی اور مثبت عالمی اشاروں کے درمیان ابتدا میں بازار میں استحکام دیکھا گیا۔ تاہم، ایران پر امریکی حملوں کی خبروں کے بعد بازار کا ماحول تیزی سے خراب ہو گیا۔ اس سے مغربی ایشیا میں قریبی مستقبل میں کشیدگی کم ہونے کی امیدیں متاثر ہوئی ہیں۔

مغربی ایشیا میں حالات کے اچانک بدلنے سے عالمی بازاروں میں خطرات سے بچنے کی جارحانہ حکمت عملی کو فروغ ملا اور توانائی کی سپلائی دوبارہ متاثر ہونے کے خدشات بڑھ گئے۔‘‘ انہوں نے کہا کہ برینٹ کروڈ کی قیمتوں میں تیز اضافے نے ایک بار پھر ہندوستانی شیئر بازاروں کے لیے بڑا دباؤ پیدا کر دیا ہے۔ ہری پرساد نے کہا، ’’ہندوستان جیسی تیل درآمد کرنے والی معیشت کے لیے خام تیل کی بڑھتی قیمتیں درآمدی مہنگائی، کرنسی پر دباؤ اور بڑھتے مالیاتی تناؤ سے متعلق خدشات کو فوراً بڑھا دیتی ہیں۔‘‘