نئی دہلی: عالمی کشیدگی میں اضافے اور خام تیل کی بلند قیمتوں کے باعث منگل کو ملکی شیئر بازاروں میں فروخت کے دباؤ کی وجہ سے گراوٹ دیکھی گئی۔ بی ایس ای سینسیکس میں 252 پوائنٹس کی کمی آئی جبکہ این ایس ای نفٹی 86 پوائنٹس گر کر بند ہوا۔

تجزیہ کاروں کے مطابق آبنائے ہرمز کے علاقے میں بڑھتی کشیدگی اور امریکہ-ایران کے درمیان جنگ بندی پر دباؤ مارکیٹ میں گراوٹ کی بڑی وجوہات رہیں۔ اس کے علاوہ خام تیل کی قیمتوں میں اضافے اور روپے کے ریکارڈ نچلی سطح تک گرنے سے بھی سرمایہ کاروں کے اعتماد پر اثر پڑا۔ 30 حصص پر مشتمل بی ایس ای سینسیکس اتار چڑھاؤ بھرے سیشن میں 251.61 پوائنٹس (0.33 فیصد) گر کر 77,017.79 پوائنٹس پر بند ہوا۔

دورانِ تجارت ایک موقع پر یہ 754.37 پوائنٹس تک گر کر 76,515.03 کی سطح تک پہنچ گیا تھا۔ اسی طرح 50 حصص پر مشتمل این ایس ای نفٹی 86.50 پوائنٹس (0.36 فیصد) کی کمی کے ساتھ 24,032.80 پوائنٹس پر بند ہوا۔ سینسیکس میں شامل نمایاں کمپنیوں میں آئی سی آئی سی آئی بینک، ٹیک مہندرا، ایکسس بینک، بھارتی ایئرٹیل اور لارسن اینڈ ٹوبرو کے شیئرز میں نمایاں کمی دیکھی گئی۔