نئی دہلی: مقامی شیئر بازاروں میں گزشتہ چار تجارتی سیشنز سے جاری گراوٹ پر بدھ کے روز وقفہ آیا اور دونوں اہم اشاریے معمولی اضافے کے ساتھ بند ہوئے۔ بی ایس ای سینسیکس 50 پوائنٹس چڑھا جبکہ این ایس ای نفٹی میں 33 پوائنٹس کی تیزی دیکھی گئی۔

تاہم خام تیل کی بلند قیمتوں اور عالمی غیر یقینی صورتحال نے مارکیٹ کی تیزی کو محدود رکھا۔ 30 شیئرز پر مشتمل بی ایس ای سینسیکس 49.74 پوائنٹس یعنی 0.07 فیصد اضافے کے ساتھ 74,608.98 پوائنٹس پر بند ہوا۔ کاروبار کے دوران سینسیکس ایک وقت میں 75,191.57 پوائنٹس کی بلند ترین سطح تک گیا جبکہ نچلی سطح 74,134.48 پوائنٹس رہی۔

اسی طرح این ایس ای نفٹی 33.05 پوائنٹس یعنی 0.14 فیصد بڑھ کر 23,412.60 پوائنٹس پر بند ہوا۔ سینسیکس میں شامل کمپنیوں میں ایشین پینٹس، ٹاٹا اسٹیل، اڈانی پورٹس، بھارت الیکٹرانکس، بھارتی ایئرٹیل اور لارسن اینڈ ٹوبرو کے شیئرز نمایاں فائدے میں رہے۔ دوسری جانب مہندرا اینڈ مہندرا، انفوسس، ٹاٹا کنسلٹنسی سروسز، سن فارما اور ٹیک مہندرا کے شیئرز نقصان میں رہے۔ عالمی تیل معیار برینٹ کروڈ کی قیمت 0.5 فیصد کمی کے ساتھ 107.27 ڈالر فی بیرل رہی۔

شیئر بازار کے اعداد و شمار کے مطابق غیر ملکی ادارہ جاتی سرمایہ کاروں (FII) نے منگل کے روز 1,959.39 کروڑ روپے مالیت کے شیئرز فروخت کیے۔ گزشتہ دو دنوں کی بھاری فروخت کے بعد بدھ کو گھریلو شیئر بازار میں نسبتاً استحکام دیکھنے کو ملا اور دونوں اہم اشاریے معمولی بڑھت کے ساتھ بند ہوئے۔

لائیولانگ ویلتھ کے ریسرچ اینالسٹ اور بانی ہری پرساد کے. نے کہا: “مارکیٹ محدود دائرے میں رہی، جو گھبراہٹ میں کی گئی فروخت میں عارضی وقفے کی نشاندہی کرتی ہے۔ تاہم عالمی اور ملکی سطح پر معاشی خدشات کے باعث سرمایہ کار اب بھی محتاط رویہ اپنائے ہوئے ہیں۔” منگل کو جاری سرکاری اعداد و شمار کے مطابق اپریل میں خوردہ مہنگائی معمولی اضافے کے ساتھ 3.48 فیصد تک پہنچ گئی۔