نئی دہلی/ آواز دی وائس
اتر پردیش کے بلرام پور میں مذہب کی تبدیلی کو کاروبار بنانے والے جمال الدین عرف چھانگور کی گرفتاری کے بعد انکشافات کا سلسلہ جاری تھا کہ اسی دوران آگرہ میں ماسٹر مائنڈ عبد الرحمٰن کے مذہب تبدیلی ریکیٹ کا پردہ فاش ہونا سب کو چونکا گیا۔ گزشتہ کچھ برسوں میں ہندوستان میں مذہب تبدیلی کے کئی ایسے ماڈیول سامنے آئے ہیں جنہوں نے نہ صرف منظم سندیکیٹ کے نیٹ ورک کو بے نقاب کیا، بلکہ اس کے پیچھے چھپے بین الاقوامی روابط اور غیر ملکی فنڈنگ کا بھی انکشاف کیا۔
چھانگور گینگ: سب سے بڑا نیٹ ورک، غیر ملکی فنڈنگ
یوپی کے بلرام پور سے شروع ہو کر ایودھیا، مرزاپور اور دیگر اضلاع تک پھیلا جمال الدین عرف چھانگور کا نیٹ ورک کسی فلمی کہانی سے کم نہیں۔ پولیس اور اے ٹی ایس کے مطابق، چھانگور ذہنی طور پر نوجوانوں اور لڑکیوں کو متاثر کرکے ان کا مذہب تبدیل کراتا تھا۔ صرف مذہب تبدیلی ہی نہیں بلکہ خواتین کے ساتھ جنسی استحصال اور کروڑوں روپے کی کالی کمائی کا نیٹ ورک بھی سامنے آیا ہے۔
تفتیش میں 500 کروڑ روپے کی غیر ملکی فنڈنگ، پاکستانی اور ترکی ہینڈلرز، ہنی ٹریپ اور لَو جہاد جیسے ثبوت ملے۔ چھانگور پر ملک مخالف سازشوں کا بھی الزام ہے، اور اس کے کئی ساتھی اب تک گرفتار ہو چکے ہیں۔
آگرہ: سوشل میڈیا ریکیٹ، آئی ایس آئی ایس سے روابط؟
آگرہ میں سامنے آئے سائبر مذہب تبدیلی ریکیٹ کا ماسٹر مائنڈ عبد الرحمٰن واٹس ایپ اور سگنل گروپس کے ذریعے پاکستان سے اس نیٹ ورک کو چلا رہا تھا۔ دو سگی بہنوں کے مذہب تبدیل کرانے کے معاملے میں عبد الرحمٰن سمیت 11 افراد کو گرفتار کیا گیا۔
لڑکیوں کو سوشل میڈیا کے ذریعے پھنسایا جاتا، مذہبی کتابیں اور ویڈیوز کے ذریعے ذہنی اثر ڈالا جاتا۔ ایک متاثرہ لڑکی کے مطابق، اس پر زبردستی شادی اور اسلام قبول کرنے کا دباؤ ڈالا گیا۔
یوپی کے دیگر اضلاع میں بھی انکشافات
فتح پور، پرتاپ گڑھ اور مرزاپور جیسے اضلاع میں بھی غیر قانونی مذہب تبدیلی کے بڑے واقعات سامنے آئے۔ فتح پور میں مشنری منتظمین سمیت 26 افراد گرفتار کیے گئے۔ تفتیش میں پتا چلا کہ مختلف اضلاع میں چرچ اور مشنریز خفیہ طور پر مذہب تبدیلی کروا رہے تھے۔
کیرالہ: مذہب تبدیلی اور 'لَو جہاد'
کیرالہ مذہب تبدیلی تنازعات اور لَو جہاد الزامات کا مرکز رہا ہے۔ کئی ہائی پروفائل کیس سامنے آئے، جیسے 'ہدیہ کیس' جس میں ایک ہندو لڑکی اخلا (ہدیہ) نے اپنی مرضی سے اسلام قبول کر کے شافین جہان سے شادی کی۔ کیرالہ ہائی کورٹ نے شادی کو کالعدم قرار دے کر این آئی اے سے تفتیش کرائی، لیکن سپریم کورٹ نے 2018 میں فیصلہ دیا کہ ہدیہ کی شادی اور مذہب تبدیلی اس کی ذاتی اور آئینی آزادی ہے۔
بعد میں این آئی اے نے کیرالہ کی 11 بین المذاہب شادیوں کی جانچ کی، لیکن کسی میں بھی سازش یا زبردستی کا ثبوت نہ ملا۔
اڈیشہ: معروف کندھمال کیس اور پہلا قانون
اڈیشہ ملک کا پہلا ریاست ہے جس نے 1967 میں 'اڈیشہ مذہبی آزادی قانون' بنایا۔ اس کے تحت انتظامیہ کی اجازت کے بغیر مذہب تبدیلی غیر قانونی ہے، اور زبردستی یا لالچ دینے پر دو سال کی قید و جرمانہ مقرر ہے۔
کندھمال ضلع میں 2008 میں فرقہ وارانہ تشدد ہوا تھا۔ یہاں مشنریز کے ذریعے دلت و قبائلی سماج میں مذہب تبدیلی کے کئی کیس سامنے آئے۔
تاہم، انتظامیہ کے مطابق گزشتہ پانچ سال میں صرف دو افراد نے سرکاری طور پر مذہب تبدیل کیا۔
مدھیہ پردیش: سخت قانون، سزائیں
مدھیہ پردیش کے نیمچ، کھنڈوا، جبّل پور جیسے شہروں میں مذہب تبدیلی کے کئی گینگ پکڑے گئے۔ یہاں ’لَو جہاد‘، شادی، یا مشنری کی مدد سے زبردستی یا لالچ دے کر مذہب تبدیل کرانے کے الزامات لگتے رہے۔
یہاں 1968 سے 'مدھیہ پردیش مذہبی آزادی قانون' نافذ ہے۔ 2006 میں اس میں ترمیم کر کے لازم کیا گیا کہ کوئی بھی فرد ایک ماہ قبل انتظامیہ کو مذہب تبدیلی کی اطلاع دے۔
2021-22 میں قانون مزید سخت کیا گیا اور زبردستی یا فریب سے مذہب تبدیل کرنے پر 10 سال قید کی سزا مقرر کی گئی۔ 2025 میں وزیر اعلیٰ موہن یادو نے اعلان کیا کہ اگر کوئی شخص زبردستی مذہب تبدیل کرا کر جنسی زیادتی کرے تو اسے سزائے موت تک دی جا سکتی ہے۔
مہاراشٹر: سخت قانون پر غور
مہاراشٹر کے نندوربار، پالگھر، ڈنڈوری، امراؤتی جیسے قبائلی اضلاع میں مشنری اداروں پر بڑے پیمانے پر مذہب تبدیلی کے الزامات ہیں۔ غیر ملکی فنڈنگ اور مشنری اسکول و اسپتالوں کے ذریعے مذہب تبدیلی کی خبریں آتی رہی ہیں۔ ریاستی حکومت ایک سخت قانون بنانے پر غور کر رہی ہے اور اس کا مسودہ تیار کر رہی ہے تاکہ مجرموں پر قانونی کارروائی کی جا سکے۔
گجرات: زبردستی مذہب تبدیلی پر سخت سزا
جوناگڑھ، احمد آباد، گودھرا، میمن نگر جیسے شہروں میں مذہب تبدیلی کے کیسز سامنے آئے۔
2022 میں ریاستی حکومت نے سپریم کورٹ میں حلف نامہ دے کر کہا کہ زبردستی مذہب تبدیلی ملک کی خودمختاری اور شہریوں کی آزادی کے لیے خطرہ ہے۔ یہاں سخت قانون نافذ ہے جس کے مطابق اگر کوئی شخص ہندو سے بدھ یا کسی اور مذہب میں جانا چاہے تو ضلع مجسٹریٹ سے اجازت لینا لازم ہے۔ بغیر اجازت تبدیلی پر فوری ایف آئی آر اور سزا کا قانون ہے۔
جھارکھنڈ اور چھتیس گڑھ: نشانے پر قبائلی
چھتیس گڑھ کے بستر اور سرگوجا علاقوں میں مذہب تبدیلی سب سے متنازع موضوع رہا۔ گزشتہ پانچ سال میں 23 قانونی کیس درج ہوئے۔ یہاں مقامی مشنریز کی مدد سے لالچ دے کر بڑی تعداد میں تبدیلی مذہب کے الزامات ہیں۔
ریاستی حکومت ایک سخت قانون لانے کی تیاری میں ہے۔
دوسری جانب جھارکھنڈ کے قبائلی اکثریتی علاقوں میں مذہب تبدیلی کا مسئلہ کافی سنگین رہا ہے۔ ہائی کورٹ نے حال ہی میں مرکزی اور ریاستی حکومت سے جواب طلب کیا کہ چنگائی سبھاؤں کے نام پر قبائلیوں کا مذہب بدلا جا رہا ہے، جس سے ان کی آبادی میں کمی آ رہی ہے۔
ہماچل پردیش اور اتراکھنڈ
ہماچل پردیش میں پچھلے کچھ سالوں میں کئی تنظیموں پر پہاڑی دیہات میں لالچ دے کر مذہب تبدیل کرانے کے الزامات لگے۔ لہذا2022 میں مذہب تبدیلی قانون کو اور سخت کیا گیا۔ اب زبردستی مذہب تبدیلی پر 10 سال تک کی قید ہو سکتی ہے۔
اتراکھنڈ میں 2020 سے 2022 کے دوران 11 کیس، اور 2023 سے جولائی 2025 کے درمیان یہ تعداد 42 ہو گئی۔
یہاں 2018 میں سخت قانون نافذ کیا گیا، جسے 2022 میں مزید سخت بنا کر 10 سال قید کی سزا رکھی گئی۔
