پٹنہ: بھارتیہ جنتا پارٹی (بی جے پی) کی بہار یونٹ نے منگل کو اعلان کیا کہ وزیر اعظم نریندر مودی کی سالگرہ اور گجرات و مرکزی حکومتوں کے سربراہ کی حیثیت سے ان کے 25 سال مکمل ہونے کے موقع پر ریاست میں 17 ستمبر سے ایک ماہ تک ’سیوا سنکلپ ابھیان‘ چلایا جائے گا۔ بی جے پی کے ریاستی صدر سنجے سراوگی نے پٹنہ میں ایک پریس کانفرنس میں کہا، ’’17 ستمبر کو وزیر اعظم مودی کی سالگرہ ہے۔

انہوں نے 7 اکتوبر 2001 کو گجرات کے وزیر اعلیٰ کے عہدے کا حلف لیا تھا۔ اگلے ماہ وہ گجرات کے وزیر اعلیٰ اور ہندوستان کے وزیر اعظم کی حیثیت سے مجموعی طور پر 25 سال مکمل کر لیں گے۔ ان برسوں کے دوران انہوں نے اقتدار کو عوامی خدمت کا ذریعہ بنایا۔ اسی لیے پارٹی نے 17 ستمبر سے ایک ماہ تک کئی پروگرام منعقد کرنے کا فیصلہ کیا ہے۔

‘‘ انہوں نے بتایا کہ 17 اکتوبر کو ’جن سیوک مہاکمبھ‘ منعقد کیا جائے گا، جس میں گرام پنچایت نمائندوں سے لے کر ارکان پارلیمنٹ تک تقریباً 1.25 لاکھ عوامی نمائندے ایک مقام پر جمع ہوں گے اور ’وندے ماترم‘ کے تمام چھ بند اجتماعی طور پر گائیں گے۔ اس موقع پر گنیز ورلڈ ریکارڈ کے جج بھی عالمی ریکارڈ بنانے کی کوشش کا جائزہ لینے کے لیے موجود رہیں گے۔

سراوگی نے کہا کہ 7 اکتوبر کو وزیر اعظم کی عوامی زندگی کے 25 سال مکمل ہونے کے موقع پر ’سیوا جیوتی یاترا‘ نکالی جائے گی۔ انہوں نے بتایا کہ اس یاترا میں ایک جیسے ڈیزائن والی مشعلیں اور گاڑیاں دیہات سے روانہ ہو کر ضلعی ہیڈکوارٹروں تک پہنچیں گی۔

سراوگی نے بتایا کہ ’سیوا سنسمرن‘ پروگرام کے تحت 17 ستمبر سے 2 اکتوبر تک دیہات، قصبوں اور پوری ریاست میں موسیقی اور ڈرامائی پیشکشوں کے ذریعے وزیر اعظم کی عوامی خدمت سے متعلق کاموں کو پیش کیا جائے گا۔ انہوں نے کہا کہ ’سیوا سنکلپ ابھیان‘ کے دوران قومی جمہوری اتحاد (این ڈی اے) کے ہر کارکن سے کم از کم 25 منٹ کسی مؤثر اجتماعی خدمت کے کام کے لیے وقف کرنے کی اپیل کی جائے گی۔

سراوگی نے بتایا کہ ’کہانی بدلاؤ کی‘ نامی سوشل میڈیا مہم کے تحت مودی کے دورِ حکومت میں لوگوں کی زندگیوں میں آنے والی حقیقی تبدیلیوں کی کہانیاں شیئر کی جائیں گی۔ انہوں نے کہا کہ اس کے علاوہ ’آنگن واڑی رابطہ ابھیان‘ اور ’سیوا سیتو ابھیان‘ بھی چلایا جائے گا۔ ان مہمات کے تحت سرکاری اسکیموں سے محروم تمام اہل مستحقین کی شناخت کرکے انہیں سرکاری اسکیموں کا فائدہ پہنچانے کی کوشش کی جائے گی۔