دھار: مدھیہ پردیش ہائی کورٹ کی جانب سے بھوجشالہ مندر-کمال مولا مسجد کمپلیکس تنازع پر جمعہ کو فیصلہ سنائے جانے سے قبل دھار شہر اور کمپلیکس کے اطراف تقریباً 1200 پولیس اہلکار تعینات کیے گئے ہیں۔ 11ویں صدی کی اس یادگار پر ہندو اور مسلم برادری طویل عرصے سے دعویٰ کرتی آ رہی ہیں، جبکہ جین برادری کے ایک گروہ نے بھی اس محکمہ آثار قدیمہ ہند (ASI) کے زیرِ حفاظت مقام پر اپنا دعویٰ پیش کیا ہے۔

دھار کے ضلع مجسٹریٹ راجیو رنجن مینا نے سوشل میڈیا پر قابلِ اعتراض مواد پھیلانے والوں کے خلاف سخت کارروائی کی وارننگ دی ہے۔ انتظامیہ نے متنازع مقام کے اردگرد رکاوٹیں لگا کر اسے گھیرے میں لے لیا ہے۔ جمعہ کی نماز اور عدالت کے فیصلے کا ایک ہی دن ہونا اضافی احتیاط کا سبب بنا ہے۔

ہندو برادری بھوجشالہ کو واغدوی (دیوی سرسوتی) کا مندر مانتی ہے، جبکہ مسلم فریق اس یادگار کو کمال مولا مسجد قرار دیتا ہے۔ اسی طرح ایک جین درخواست گزار کا دعویٰ ہے کہ یہ کمپلیکس قرونِ وسطیٰ کا جین مندر اور گروکل تھا۔ ASI کے 2003 کے انتظام کے تحت ہندو اور مسلم برادری بالترتیب منگل اور جمعہ کے دن یہاں عبادت اور نماز ادا کرتی ہے۔

ہندو فریق نے اس انتظام کو ہائی کورٹ میں چیلنج کرتے ہوئے پورے کمپلیکس میں عبادت کے خصوصی حق کی درخواست کی ہے۔ ہائی کورٹ نے 11 مارچ 2024 کو بھوجشالہ مندر-کمال مولا مسجد کمپلیکس کا سائنسی سروے کرانے کا حکم دیا تھا۔ ASI نے 22 مارچ 2024 سے سروے شروع کیا اور 98 دن تک جاری رہنے والے تفصیلی سروے کے بعد اپنی رپورٹ عدالت میں پیش کی۔

اندور بینچ نے دونوں فریقوں کے دلائل سننے کے بعد فیصلہ محفوظ کر لیا تھا، جو جمعہ دوپہر تقریباً ڈھائی بجے سنایا جا سکتا ہے۔ مسلم برادری کے لوگ جمعہ کو دوپہر ایک بجے سے تین بجے تک کمپلیکس میں نماز ادا کرتے ہیں۔ اسی کو دیکھتے ہوئے انتظامیہ نے رکاوٹیں لگا دی ہیں اور سوشل میڈیا پر افواہوں سے بچنے کی ہدایت جاری کی ہے۔

مینا نے کہا، “دھار میں واقع اس محفوظ یادگار سے متعلق معاملے میں عدالت کا فیصلہ آنے کا امکان ہے۔ میں ضلع کے تمام شہریوں سے امن برقرار رکھنے کی اپیل کرتا ہوں۔” انہوں نے کہا، “کسی بھی گمراہ کن خبر یا افواہ پر توجہ نہ دیں۔ ضلعی انتظامیہ ایسی معلومات پر نظر رکھے ہوئے ہے اور کوئی قابلِ اعتراض مواد سامنے آنے پر سخت کارروائی کی جائے گی۔”

سماعت کے دوران ہندو، مسلم اور جین برادری کے درخواست گزاروں نے تفصیلی دلائل دیتے ہوئے اپنے اپنے طبقے کے لیے کمپلیکس میں خصوصی عبادت کے حقوق کی درخواست کی ہے۔ ASI نے اپنی 2000 سے زائد صفحات کی رپورٹ میں کہا ہے کہ مسجد سے پہلے یہاں دھار کے پرمار راجاؤں کے دور کا ایک بڑا ڈھانچہ موجود تھا اور موجودہ متنازع عمارت قدیم مندر کے آثار دوبارہ استعمال کر کے تعمیر کی گئی۔

ہندو فریق کا دعویٰ ہے کہ ASI کے سائنسی سروے کے دوران ملے سکے، مورتیاں اور کتبے اس بات کا ثبوت ہیں کہ یہ کمپلیکس اصل میں مندر تھا۔ تاہم مسلم فریق نے عدالت میں ASI کی رپورٹ کو “جانبدار” قرار دیتے ہوئے کہا ہے کہ اسے ہندو درخواست گزاروں کے مؤقف کی حمایت میں تیار کیا گیا ہے۔ اس پر ASI نے عدالت کو بتایا کہ سائنسی سروے ماہرین کی مدد سے کیا گیا تھا، جن میں مسلم برادری کے تین ماہرین بھی شامل تھے۔