رانچی :جھارکھنڈ کے ضلع پلامو میں جمعرات کی صبح ماؤوادیوں کے ایک دھڑے تریتیہ سملن پرستتی کمیٹی(TSPC) کے ساتھ فائرنگ کے تبادلے میں دو سیکورٹی اہلکار ہلاک اور ایک زخمی ہو گیا۔ پولیس نے یہ اطلاع دی۔

یہ جھڑپ رات تقریباً ساڑھے بارہ بجے ماناتو تھانہ حدود کے تحت آنے والے گاؤں کیدل میں اس وقت شروع ہوئی جب سیکورٹی فورسز اور کالعدم تنظیمTSPC کے ارکان آمنے سامنے آگئے۔

پلامو کے ڈپٹی انسپکٹر جنرل (ڈی آئی جی) نوشاد عالم نے پی ٹی آئی کو بتایا:"فائرنگ میں دو سیکورٹی اہلکار ہلاک اور ایک زخمی ہو گیا۔ زخمی کو میدنی رائے میڈیکل کالج و اسپتال میں داخل کرایا گیا ہے۔"

ایک دیگر پولیس افسر نے بتایا کہ خفیہ اطلاع ملی تھی کہTSPC کمانڈر ششی کانت گنجھو اور اس کا دستہ کیدل گاؤں میں موجود ہے، جس کے بعد فورسز نے آپریشن شروع کیا۔

انہوں نے بتایا:"جیسے ہی سیکورٹی ٹیم موقع پر پہنچی، TSPC کے ارکان نے فورسز پر فائرنگ شروع کر دی۔ فائرنگ کے تبادلے میں تین اہلکار گولی لگنے سے زخمی ہوئے۔ فوراً انہیں میدنی رائے میڈیکل کالج و اسپتال لے جایا گیا، جہاں ڈاکٹروں نے دو اہلکاروں کو مردہ قرار دیا، جبکہ ایک زخمی اہلکار کا علاج جاری ہے۔"