نئی دہلی: جمعیت علمائے ہند کے صدر ارشد مدنی نے بیان دیا کہ فرقہ پرست طاقتیں اسلام سے ڈرتی ہیں اور اسے بدنام کرنے کے لیے جھوٹا پروپیگنڈا کرتی ہیں۔ انہوں نے کہا کہ اسلام کو دہشت گردی سے جوڑنا غلط ہے، کیونکہ اسلام امن، محبت اور انسانیت کا پیغام دیتا ہے۔

مدنی نے کہا کہ اسلام کے بارے میں افواہیں پھیلا کر لوگوں کے دلوں میں نفرت ڈالی جا رہی ہے۔ انہوں نے کہا، "یہ لوگ ایٹم بم سے اتنا نہیں ڈرتے، جتنا اسلام سے ڈرتے ہیں۔" انہوں نے دعویٰ کیا کہ اسلام کو ختم کرنے کا خواب دیکھنے والی طاقتیں ناکام ہوں گی، کیونکہ اسلام قیامت تک زندہ رہے گا۔

ارشد مدنی نے کہا کہ سب انسان آدم کی اولاد ہیں اور مذہب بعد میں آیا۔ انہوں نے کہا کہ جو لوگ اسلام کے خلاف ماحول بنا رہے ہیں، وہ نہ تاریخ سمجھتے ہیں اور نہ ملک سے محبت کرتے ہیں۔ انہوں نے لوگوں سے اپیل کی کہ وہ کہیں بھی رہیں، محبت اور بھائی چارے کا پیغام زندہ رکھیں۔ انہوں نے کہا کہ ہندو، مسلمان، سکھ، عیسائی سب کو محبت اور اخوت کی زندگی گزارنی چاہیے۔

مدنی نے کہا کہ مذہب کے نام پر نفرت پھیلانے والوں کی راہ پر چلنا غلط ہے اور ایسی سوچ ملک کے لیے نقصان دہ ہے۔ مدنی نے کہا کہ جو لوگ اقتدار کا استعمال نفرت پھیلانے کے لیے کرتے ہیں، انہیں سمجھنا چاہیے کہ اقتدار کبھی کسی کے پاس مستقل نہیں رہتا، حکومتیں آتی جاتی رہتی ہیں۔ انہوں نے کہا کہ اسلام 1400 سال سے زندہ ہے اور ان شاء اللہ قیامت تک زندہ رہے گا۔