پلول/ آواز دی وائس

ہریانہ کے پلول ضلع میں پیر کے روز ایک تیز رفتار کار نے اسکول سے لوٹ رہے 3 بچوں کو کچل دیا۔ اس حادثے میں 2 بچوں کی موقع پر ہی موت ہو گئی جبکہ ایک کی حالت نازک ہے۔ کار چلانے والا شخص ایک پولیس اہلکار تھا جو نشے میں دھت تھا۔ وہ بچوں کو ٹکر مارنے کے بعد وہاں سے فرار ہو ہی رہا تھا کہ آس پاس کے لوگوں نے اسے پکڑ لیا اور پولیس کو اطلاع دے دی۔ جب پولیس ملزم کو گرفتار کرکے لے جانے لگی تو لوگوں نے پولیس کی گاڑی کا بھی پیچھا کیا۔ وہ چاہتے تھے کہ ملزم کا میڈیکل ٹیسٹ ان کے سامنے ہی ہو۔

زخمی بچے کو روہتک پی جی آئی ریفر

دو بچوں کی موت کے بعد موقع پر تناؤ کا ماحول ہے۔ آس پاس کے تھانوں کی پولیس کو تعینات کیا گیا ہے۔ دونوں بچوں کی لاشوں کو نلہڑ میڈیکل کالج میں رکھوایا گیا ہے جبکہ زخمی بچے کو روہتک پی جی آئی ریفر کر دیا گیا ہے۔ یہ واقعہ پلول ضلع کے ہتھین بلاک کے گاؤں اُٹاڑ کا ہے۔ جاں بحق بچوں کے والد شاہب الدین نے بتایا کہ ان کا خاندان نوریہ محلے میں رہتا ہے۔ ان کے تینوں بچے اُٹاڑ کے نجی اسکول گریبا پبلک اسکول میں پڑھتے تھے۔ ان میں ایان (5)، احسان (7) اور ارجان (9) شامل تھے۔ انہوں نے بتایا کہ ایان اور احسان پانچویں کلاس میں پڑھتے تھے۔ چھٹی کے بعد جب تینوں بچے اسکول سے گھر جانے کے لیے سڑک پر آئے تو ایک تیز رفتار کار نے تینوں کو ٹکر مار دی۔ اس میں ایان اور احسان کی موقع پر ہی موت ہو گئی جبکہ ارجان کی حالت نازک ہے۔

بچوں کو ٹکر مارنے کے بعد بھاگ رہا تھا پولیس اہلکار

بچوں کے والد کا کہنا ہے کہ ان کے بچوں کو نریش کمار نے ٹکر ماری۔ وہ ہریانہ پولیس میں ہیڈ کانسٹیبل کے طور پر تعینات ہے۔ وہ نشے میں تھا اور نئی گاڑی میں سوار تھا۔ ٹکر مارنے کے بعد وہ رکا نہیں بلکہ موقع سے گاڑی بھگا لے گیا۔ اس کے بعد لوگوں نے اس کی گاڑی کا پیچھا کیا اور تقریباً 500 میٹر آگے جا کر اسے روک لیا۔

ملزم پولیس اہلکار گرفتار

شاہب الدین نے بتایا کہ ملزم پولیس اہلکار لوگوں سے جھگڑا کر رہا تھا۔ وہ ماننے کو تیار نہیں تھا کہ اس نے تین بچوں کو اپنی گاڑی سے کچل دیا ہے۔ وہ اکڑ دکھا رہا تھا اور لوگوں کو پولیس کی وردی کا رعب جتلا رہا تھا۔ اس کے بعد لوگوں نے پولیس کو اطلاع دی۔ کچھ ہی دیر میں پولیس بھی موقع پر پہنچ گئی۔ اس معاملے پر ہتھین ڈی ایس پی مہندر ورما کا کہنا ہے کہ ملزم پولیس اہلکار کو گرفتار کر لیا گیا ہے اور اس کا میڈیکل ٹیسٹ کرا دیا گیا ہے۔ اس معاملے میں متاثرہ خاندان کو انصاف دلایا جائے گا۔