سنبھل: اتر پردیش کے ضلع سنبھل میں ایک مسلم شخص نے الزام لگایا ہے کہ اسے اور اس کے خاندان کو جمعہ کی نماز ادا کرنے سے روکا گیا اور دوسرے مسلم برادری کے بعض افراد نے ان کا سماجی بائیکاٹ کر دیا۔ اس شکایت کے بعد پولیس نے مقدمہ (ایف آئی آر) درج کرنے کی ہدایت دی ہے۔ یہ معاملہ حیات نگر تھانہ علاقے کے منڈلی سمس پور گاؤں کا ہے، جہاں دھنا برادری سے تعلق رکھنے والے محمد وسیم نے الزام لگایا کہ ترک برادری کے چند افراد نے انہیں اور ان کے اہل خانہ کو جمعہ کی نماز ادا کرنے سے روکا اور مذہبی سرگرمیوں سے الگ کر دیا۔

یہ واقعہ وزیر اعلیٰ یوگی آدتیہ ناتھ کے سنبھل دورے کے چند روز بعد سامنے آیا ہے۔ اپنے دورے کے دوران یوگی نے مبینہ طور پر کہا تھا، "ترکوں کی ترکائی نہیں چلے گی۔" محمد وسیم نے بتایا کہ وہ دیوبندی مکتبِ فکر سے تعلق رکھتے ہیں۔ ان کے مطابق گاؤں میں چار مساجد ہیں، جن میں 120 سال پرانی مرکزی مسجد بھی شامل ہے، جہاں دیوبندی اور بریلوی دونوں مکتبۂ فکر کے لوگ ایک صدی سے زائد عرصے سے اکٹھے نماز ادا کرتے آئے ہیں۔

وسیم نے بتایا کہ 5 جنوری 2024 کو اذان، امام کے لیے چندہ اور ان کے کھانے کے انتظام کو لے کر تنازع پیدا ہوا تھا، جسے 26 جنوری 2024 کو اس وقت کے تھانہ انچارج اور مقامی بزرگوں کی موجودگی میں حل کر لیا گیا تھا۔ ان کے مطابق سمجھوتے میں طے پایا تھا کہ اذان صرف امام دیں گے، نمازی اپنی مالی حیثیت کے مطابق چندہ دیں گے اور امام باری باری ہر گھر میں کھانا کھائیں گے۔ وسیم کا الزام ہے کہ تقریباً ڈیڑھ سال تک یہ نظام چلنے کے بعد مسجد انتظامیہ کے بعض افراد نے خود اذان دینا شروع کر دی، ان کے خاندان سے چندہ لینا بند کر دیا اور امام کا ان کے گھر کھانا کھانے کا سلسلہ بھی ختم کر دیا۔

انہوں نے مزید الزام لگایا کہ مسجد کے متولی عتیق احمد اور ان کے ساتھیوں نے انفرادی نماز اور جمعہ کی اجتماعی نماز کو ملا کر چھ نمازوں کا ایک نیا طریقہ رائج کیا، جس کی انہوں نے اور ان کے خاندان نے مخالفت کی۔ وسیم کے مطابق 3 جولائی کو جمعہ کی نماز کے بعد انہیں کہا گیا کہ جب تک وہ اس نئے طریقۂ کار کو قبول نہیں کرتے، انہیں مسجد میں نماز ادا کرنے کی اجازت نہیں دی جائے گی۔

انہوں نے الزام لگایا، "میں او بی سی کی دھنا برادری سے ہوں، جبکہ وہ ترک برادری سے تعلق رکھتے ہیں۔ انہوں نے میرا سماجی بائیکاٹ کر دیا ہے اور میرے خاندان پر گاؤں چھوڑنے کے لیے دباؤ ڈالا جا رہا ہے۔" ضلع پولیس سربراہ کرشن کمار بشنوئی نے بتایا کہ گاؤں میں دھنا برادری کے پانچ خاندان رہتے ہیں، جن میں سے ایک خاندان کے رکن محمد وسیم نے جمعہ کے روز ضلع ہیڈکوارٹر میں شکایت درج کرائی۔

بشنوئی نے کہا کہ وسیم نے الزام لگایا ہے کہ ان کے بنیادی حقوق کی خلاف ورزی کی جا رہی ہے، انہیں جمعہ کی نماز سے روکا جا رہا ہے اور دھنا برادری سے تعلق رکھنے کی وجہ سے مسجد انتظامیہ انہیں اور ان کے خاندان کو کافی عرصے سے ہراساں کر رہی ہے۔ انہوں نے کہا کہ یہ ایک سنگین معاملہ ہے کیونکہ اس کا تعلق بنیادی حقوق سے ہے۔ متعلقہ تھانے کو ایف آئی آر درج کرنے اور شکایت کنندہ کے بنیادی حقوق کے تحفظ کو یقینی بنانے کی ہدایت دی گئی ہے۔

پولیس کے مطابق شکایت میں یہ بھی کہا گیا ہے کہ گزشتہ ڈیڑھ سال سے مسجد کے امام ان کے گھر کھانے کے لیے نہیں آ رہے، انہیں مسجد میں نماز پڑھنے کی اجازت نہیں دی جا رہی اور ان کی زکوٰۃ بھی قبول نہیں کی جا رہی۔ پولیس نے بتایا کہ اس سے قبل دونوں فریقوں میں سمجھوتہ کرانے کی کوشش کی گئی تھی، تاہم وہ کامیاب نہیں ہو سکی۔ معاملے میں قانونی کارروائی شروع کر دی گئی ہے اور تحقیقات کے بعد مزید کارروائی کی جائے گی۔