لکھنؤ/ آواز دی وائس
مشہور شاعر منور رانا کی بیٹی اور سماجوادی پارٹی (سپا) کی خواتین ونگ کی قومی نائب صدر سمیعہ رانا نے پولیس پر انہیں نظر بند کرنے کا الزام لگایا ہے، تاہم پولیس نے اس کی تردید کی ہے۔
بہار کے وزیرِ اعلیٰ نتیش کمار کی جانب سے تقرری نامے تقسیم کرنے کے دوران نو منتخب مسلم خاتون ڈاکٹر کا نقاب ہٹوانے اور اتر پردیش حکومت کے وزیر ڈاکٹر سنجے نشاد کے مبینہ قابلِ اعتراض بیان کے معاملے پر رانا نے 16 دسمبر کو لکھنؤ کے قیصر باغ تھانے میں تحریری درخواست دے کر ایف آئی آر درج کرنے کا مطالبہ کیا تھا۔
سمیعہ رانا نے کہا کہ میں کل سے نظر بند ہوں۔ قیصر باغ پولیس ایف آئی آر درج نہیں کر رہی ہے۔ انہوں نے دعویٰ کیا کہ ان اقدامات سے دلبرداشتہ ہو کر متعلقہ خاتون ڈاکٹر کولکاتا چلی گئی اور اس نے نوکری بھی چھوڑ دی، لیکن اس کے باوجود ایف آئی آر درج نہیں کی جا رہی۔ تاہم، خاتون ڈاکٹر نے نوکری چھوڑنے کے حوالے سے عوامی طور پر کوئی بیان نہیں دیا ہے۔
بہار کے وزیرِ صحت منگل پانڈے نے جمعرات کو کہا تھا کہ انہیں ایسی کسی خبر کی اطلاع نہیں ہے، جس میں یہ دعویٰ کیا گیا ہو کہ مذکورہ ڈاکٹر نے سرکاری ملازمت اختیار کرنے سے انکار کر دیا ہے۔
سپا رہنما رانا نے کہا کہ چونکہ میں بھی اسی سماج سے تعلق رکھتی ہوں اور حجاب پہنتی ہوں، اس لیے مجھے اس کی تکلیف محسوس ہوتی ہے۔ پولیس کی جانب سے نظر بندی کی تردید پر انہوں نے کہا کہ میں نے سی سی ٹی وی لگایا ہے اور کل سے میرے گھر کے سامنے پولیس تعینات ہے۔ وہ مجھے نظر بند بھی کر رہے ہیں اور سرکاری طور پر اسے تسلیم بھی نہیں کر رہے۔ اس کا مطلب ہے کہ مجھے یرغمال بنایا گیا ہے۔
انہوں نے کہا کہ اب وہ پولیس کمشنر کے سامنے اپنی شکایت درج کرائیں گی۔ رانا نے پولیس کمشنر کو دی جانے والی تحریر بھی ساتھ شیئر کی ہے، جس میں الزام لگایا گیا ہے کہ پٹنہ میں آیوش ڈاکٹروں کے تقرری نامے تقسیم کرنے کے دوران وزیرِ اعلیٰ نتیش کمار نے ڈاکٹر نصرت پروین نامی مسلم خاتون ڈاکٹر کا عوامی طور پر نقاب ہٹا کر توہین کی اور نامناسب بیان دے کر ایک خاص مذہب کے خلاف نفرت پھیلانے کی کوشش کی۔
تحریر میں یہ بھی الزام لگایا گیا ہے کہ اس واقعے کے ذریعے مذہبی اشتعال پھیلانے اور سیاسی فائدہ حاصل کرنے کی کوشش کی گئی۔ شکایت میں اس واقعے پر اتر پردیش کے کابینہ وزیر ڈاکٹر سنجے نشاد کی جانب سے دیے گئے مبینہ توہین آمیز بیان کو بھی پورے مسلم سماج کی توہین کی مذموم کوشش قرار دیا گیا ہے۔ رانا نے دعویٰ کیا کہ نتیش کمار سے متعلق واقعے کی تصاویر اور سنجے نشاد کے بیانات کے اقتباسات تحریر کے ساتھ منسلک کیے گئے ہیں۔
13.webp "ایس پی لیڈرسمعیہ رانا نے گھر میں نظربندی کا الزام لگایا")
