نئی دہلی / آواز دی وائس
بہار میں ووٹر لسٹ کے ایس آئی آر سمیت مختلف معاملات پر اپوزیشن ممبران کے ہنگامے کی وجہ سے جمعرات کو راجیہ سبھا کی کارروائی شروع ہونے کے محض پانچ منٹ بعد ہی دوپہر دو بجے تک ملتوی کر دی گئی۔
ہنگامے کے باعث ایوانِ بالا میں آج بھی زیرو آور اور سوال جواب کا سلسلہ نہیں ہو سکا۔
کارروائی شروع ہوتے ہی نائب چیئرمین ہریونش نے ضروری دستاویزات ایوان کے رکھوائے۔ اس کے بعد انہوں نے بتایا کہ انہیں ایوان کا مقررہ کام کاج ملتوی کر کے چار موضوعات پر بحث کرانے کے لیے قاعدہ 267 کے تحت 15 نوٹس موصول ہوئے ہیں۔
انہوں نے بتایا کہ ان میں سے کوئی بھی نوٹس قواعد کے مطابق مناسب نہیں پایا گیا، اس لیے انہیں مسترد کر دیا گیا۔ اس پر اپوزیشن اراکین نے سخت اعتراض کیا اور ہنگامہ آرائی شروع کر دی۔
کچھ ممبران اپنی نشستوں سے اٹھ کر ایوان کے اگلے حصے تک بھی آ گئے۔
نائب چیئرمین نے اراکین سے پر سکون رہنے اور زیرو آور چلنے دینے کی اپیل کی۔ انہوں نے کہا كہ براہِ کرم زیرو آور چلنے دیں۔ اگر آپ زیرو آور نہیں چلنے دینا چاہتے تو ایوان کی کارروائی دوپہر دو بجے تک ملتوی کی جاتی ہے۔
پارلیمنٹ کے مانسون اجلاس کے آغاز سے ہی ایوان میں کانگریس سمیت اپوزیشن ممبران بہار میں ایس آئی آر کے مسئلے پر بحث کا مطالبہ کر رہے ہیں اور ان کے ہنگامے کی وجہ سے اس اجلاس کے دوران راجیہ سبھا میں ایک بار بھی زیرو آور اور سوال جواب کا سلسلہ نہیں ہو سکا ہے۔
