نئی دہلی: لوک سبھا میں قائدِ حزبِ اختلاف راہل گاندھی نے بدھ کے روز عوامی امتحانات (غیر منصفانہ ذرائع کی روک تھام) ترمیمی بل، 2026 پر بحث کے دوران نیٹ پرچہ لیک کے خلاف طلبہ کے احتجاج پر پولیس کارروائی کا حوالہ دیتے ہوئے مرکزی وزیر داخلہ امت شاہ پر سنگین الزامات عائد کیے، جس پر حکمراں اتحاد نے شدید احتجاج کرتے ہوئے ان سے معافی کا مطالبہ کیا۔

پارلیمانی امور کے وزیر کرن رجیجو نے کہا کہ راہل گاندھی واضح کریں کہ انہوں نے ملک کے ایک ذمہ دار عہدیدار پر یہ سنگین الزام کس بنیاد پر لگایا، ورنہ وہ ایوان سے معافی مانگیں۔ لوک سبھا اسپیکر اوم برلا نے بھی کہا کہ قائدِ حزبِ اختلاف کسی بھی شخص پر بغیر حقائق، تحقیقات اور شواہد کے الزام نہیں لگا سکتے۔

ایوان میں ہنگامے کے باعث اسپیکر نے کارروائی دوپہر 1:53 بجے سے 2:30 بجے تک ملتوی کر دی۔ بل پر بحث میں حصہ لیتے ہوئے راہل گاندھی نے الزام لگایا کہ ملک کے تعلیمی نظام کی روح پر بھارتیہ جنتا پارٹی (بی جے پی) سے وابستہ ایک نظریاتی تنظیم نے قبضہ کر رکھا ہے اور سابق وزیر تعلیم دھرمیندر پردھان محض ایک علامتی شخصیت تھے۔

انہوں نے طلبہ کی تحریک کا ذکر کرتے ہوئے کہا کہ مظاہرہ کرنے والے نوجوانوں نے خوف پر قابو پا کر حکومت سے کھل کر سوال کیے، جبکہ بہت سے والدین میں بی جے پی اور اس کی نظریاتی تنظیم کا سامنا کرنے کی ہمت نہیں تھی۔ راہل گاندھی نے ایوان میں وزیر داخلہ امت شاہ کی عدم موجودگی پر بھی تنقید کرتے ہوئے دعویٰ کیا کہ وہ ایوان میں آنے کی ہمت نہیں رکھتے اور اسی لیے موجود نہیں ہیں۔

اس کے بعد انہوں نے طلبہ کے خلاف طاقت کے استعمال کا حوالہ دیتے ہوئے وزیر داخلہ پر سنگین الزامات عائد کیے، جس پر حکمراں اتحاد کے ارکان نے سخت اعتراض کیا۔ کرن رجیجو نے کہا کہ راہل گاندھی نے غلط بیان دیا ہے اور پارلیمانی مراعات کا غلط استعمال کیا ہے، اس لیے انہیں معافی مانگنی چاہیے۔

سماج وادی پارٹی کے صدر اکھلیش یادو نے کہا کہ اگر قائدِ حزبِ اختلاف نے سنگین الزام لگایا ہے تو حکومت کو یہ بتانا چاہیے کہ طلبہ پر طاقت کے استعمال کا حکم کس نے دیا تھا۔ اس دوران حکمراں اتحاد کے ارکان نے "راہل گاندھی معافی مانگو" کے نعرے لگائے، جبکہ کانگریس ارکان "قائدِ حزبِ اختلاف کو بولنے دو" اور "وزیر داخلہ جواب دو" کے نعرے لگاتے رہے، جس سے ایوان میں طویل وقت تک تعطل کی کیفیت برقرار رہی۔

راہل گاندھی نے کہا کہ سڑکوں پر نکلنے والے نوجوانوں کا احتجاج غصے، تشدد یا نفرت کا اظہار نہیں بلکہ ان کے مستقبل سے متعلق ایک جائز آواز تھی، جس کا تمام سیاسی جماعتوں کو احترام کرنا چاہیے۔ انہوں نے دعویٰ کیا کہ ایک امتحان کی تیاری پر لوگ جتنا خرچ کر رہے ہیں، وہ حکومت کے تعلیمی بجٹ سے بھی زیادہ ہے، جبکہ موجودہ نظام غریب طلبہ سے لاکھوں روپے وصول کر رہا ہے۔

انہوں نے طنزیہ انداز میں کہا کہ وزیر دفاع راج ناتھ سنگھ نے درست کہا تھا کہ موجودہ حکومت متحدہ ترقی پسند اتحاد (یو پی اے) کی حکومت جیسی نہیں، کیونکہ اس حکومت میں وزرا استعفیٰ نہیں دیتے۔ راہل گاندھی نے الزام لگایا کہ دھرمیندر پردھان نے کبھی وزارت نہیں چلائی، بلکہ تعلیمی نظام کو بی جے پی سے وابستہ ایک نظریاتی تنظیم چلا رہی ہے، اور طلبہ کو سمجھنا چاہیے کہ ان کا اصل مقابلہ اسی تنظیم سے ہے۔ تقریر کے آغاز میں راہل گاندھی کی جانب سے استعمال کیے گئے ایک لفظ پر بھی حکمراں اتحاد نے اعتراض کیا۔

کرن رجیجو نے اسے غیر پارلیمانی قرار دیتے ہوئے کارروائی سے حذف کرنے کا مطالبہ کیا۔ اسپیکر اوم برلا نے راہل گاندھی کو ہدایت دی کہ وہ پارلیمنٹ کے وقار کا خیال رکھتے ہوئے بل کے موضوع پر بات کریں۔ حکمراں اتحاد کی مسلسل ٹوک ٹاک کے باعث راہل گاندھی کچھ دیر کے لیے اپنی نشست پر بیٹھ گئے، تاہم بعد میں وزیر دفاع راج ناتھ سنگھ نے ان سے تقریر جاری رکھنے کی اپیل کی اور اپنی جماعت کے ارکان سے کہا کہ وہ ان کی تقریر کے دوران مداخلت نہ کریں۔ اس کے بعد راہل گاندھی نے اپنی تقریر دوبارہ شروع کی، لیکن دونوں جانب سے نعرے بازی اور تلخ جملوں کا تبادلہ جاری رہا، جس کے باعث ایوان کی کارروائی دوبارہ دوپہر 2:30 بجے تک ملتوی کر دی گئی۔