نئی دہلی: راشٹریہ سویم سیوک سنگھ سے وابستہ ہفتہ وار جریدہ آرگنائزر نے اپنے تازہ اداریے میں کہا ہے کہ شناخت کی بنیاد پر تقسیم پیدا کرنے کی کوششوں کے باوجود سنگھ نے بھارت کی قومی شعور کو بیدار کرنے اور وسعت دینے کی “غیر معمولی صلاحیت” کا مظاہرہ کیا ہے۔

اداریے کے مطابق یہ عمل وجئے دشمی کے موقع سے شروع ہوا، جس کے تحت اکتوبر 2025 سے سرگرم رضاکاروں کو بڑے پیمانے پر منظم کیا گیا۔ صرف 15 دنوں میں 62 ہزار سے زائد پروگرام منعقد کیے گئے، جن میں 32 لاکھ سے زیادہ رضاکاروں نے شرکت کی۔ اس کے علاوہ، ملک بھر میں 22 ہزار مقامات پر “پتھ سنچلن” (جلوس) نکالے گئے، جن میں 25 لاکھ سے زائد افراد شریک ہوئے۔

اداریے میں کہا گیا کہ پہلے مرحلے میں بیدار افراد کے ایک اہم گروہ کو منظم کیا گیا تاکہ مہم کو اگلے مرحلے تک لے جایا جا سکے۔ جریدے کے مطابق “گھر رابطہ مہم” کے ذریعے اب تک 10 کروڑ سے زیادہ خاندانوں تک رسائی حاصل کی گئی ہے، جو 46 میں سے 37 صوبوں تک پھیلی ہوئی ہے۔ اس مہم کے ذریعے نہ صرف فعال رضاکاروں بلکہ اُن افراد تک بھی پہنچنے کی کوشش کی گئی جو سنگھ کے کام کے حوالے سے مثبت رائے رکھتے ہیں۔

اداریے میں کہا گیا کہ اس عمل نے قوم کی “پوشیدہ طاقت” کو بیدار کیا اور رضاکاروں کو موقع دیا کہ وہ معاشرے کے عام سوالات اور خدشات کو بہتر طور پر سمجھ سکیں، چاہے وہ حمایتی ہوں یا ناقدین۔ اداریے کے مدیر پرفل کیتکر نے لکھا کہ جب شناخت کی بنیاد پر تقسیم کی کوششیں ایک غیر مستحکم عالمی ماحول کے ساتھ ملتی ہیں، تو ایسے وقت میں سنگھ نے قومی شعور کو مضبوط کرنے کی نمایاں صلاحیت دکھائی ہے۔

اداریے میں مزید کہا گیا کہ ملک بھر میں منعقد ہونے والے ہندو اجتماعات میں تین کروڑ سے زائد افراد نے شرکت کی، جو ذات، مسلک، مذہب اور سیاسی وابستگی سے بالاتر تھے۔ یہ پروگرام مقامی کمیٹیوں کی جانب سے منعقد کیے گئے، جن میں مختلف نمایاں شخصیات اور تنظیمیں شامل تھیں۔

اس کے علاوہ “سدبھاو بیٹھک” اور “پرمکھ جن سنگوشٹھی” جیسے پروگراموں کے ذریعے سماجی ہم آہنگی کو فروغ دینے اور فکری و سماجی قیادت کو ایک پلیٹ فارم پر لانے کی کوشش کی گئی۔ ان نشستوں میں سوال و جواب کے ذریعے سنگھ سے متعلق پائی جانے والی غلط فہمیوں کو دور کرنے کی بھی کوشش کی گئی۔

اداریے کے مطابق “جاگرتی شکتی، سپت شکتی اور سجن شکتی” قومی تعمیر نو کے بنیادی ستون ہیں، اور سنگھ نے ان مواقع کو استعمال کرتے ہوئے ان طبقات تک رسائی حاصل کی جہاں ابھی تک اس کی پہنچ نہیں تھی۔ سنگھ کی اعلیٰ فیصلہ ساز تنظیم اکھل بھارتیہ پرتی ندھی سبھا کی حالیہ میٹنگ ہریانہ کے سملاکھا میں منعقد ہوئی، جس میں 2025-26 کے کاموں کا جائزہ لیا گیا اور مستقبل کی حکمت عملی طے کی گئی۔ 15 مارچ کو ختم ہونے والی اس تین روزہ میٹنگ میں تنظیمی توسیع، قومی مفاد میں مثبت قوتوں کی شمولیت بڑھانے اور سماجی ہم آہنگی کو مضبوط کرنے کا عزم ظاہر کیا گیا۔ اس اجلاس میں سنگھ کے سربراہ موہن بھاگوت، جنرل سیکریٹری دتا تریہ ہوسبو لے سمیت دیگر اعلیٰ عہدیدار شریک ہوئے۔ اس کے علاوہ سنگھ سے وابستہ 32 تنظیموں کے نمائندوں نے بھی شرکت کی، جن میں بھارتیہ جنتا پارٹی بھی شامل ہے۔