نئی دہلی، 6 ستمبر 2025: ٹی وی نیوز ایجنسی اے این آئی کے حوالے سے کچھ اخبارات میں یہ خبر شائع کی گئی ہے کہ جمعیۃ علماء ہند کے صدر مولانا محمود اسعد مدنی نے اپنے انٹرویو میں کہا ہے کہ ’’گیانواپی مسجد یا متھرا کے تعلق سے دونوں برادریوں کے لوگ آپس میں بیٹھ کر بات کریں۔‘‘ اس پر جمعیۃ نے وضاحت کرتے ہوئے کہا کہ یہ خبر پوری طرح سے بے بنیاد اور جھوٹی ہے۔ مولانا مدنی نے اپنے پورے انٹرویو میں نہ تو کوئی ایسا بیان دیا ہے اور نہ ہی اس تعلق سے کوئی سوال یا جواب آیا ہے۔

مولانا مدنی نے انٹرویو کے دوران ایک سوال کے جواب میں آر ایس ایس سربراہ موہن بھاگوت جی کی طرف سے دونوں برادریوں کے درمیان خوشگوار تعلقات اور باہمی رشتوں کو بہتر بنانے کے لیے مکالمہ قائم کرنے میں کسی بھی پیش رفت کی تعریف کی ہے۔ مولانا مدنی نے اس سلسلے میں 2023 میں منعقدہ جمعیۃ علماء ہند کی 34ویں عام اجلاس کے صدارت کے خطاب کا ذکر کرتے ہوئے کہا کہ ہماری تنظیم نے اس تعلق سے پہلے ہی ایک قرارداد منظور کی تھی جس میں باہمی بات چیت کو تمام مسائل کا حل بتایا گیا تھا اور آر ایس ایس کے سرسنگھ چالک اور ان کے متبعین کو گرمجوشی سے مدعو کیا گیا تھا کہ آئیے باہمی اختلافات اور دشمنی و نفرت کو بھلا کر ایک دوسرے کو گلے لگائیں۔

مولانا مدنی نے کہا کہ جہاں تک مساجد کا معاملہ ہے تو اصل حقیقت یہ ہے کہ گیانواپی اور متھرا وغیرہ معاملات میں فیصلہ لینے کا اختیار متعلقہ مسجد کمیٹیوں کا ہے، جو ان معاملات میں شریعت اور قانونی طور پر فریق ہیں اور ان کے پاس شریعت کے دائرے میں رہتے ہوئے کسی سے بھی مکالمہ کرنے کا حق ہے۔ جہاں تک متھرا کے معاملے کا تعلق ہے، وہاں 1968 میں باضابطہ طور پر عدالت کی نگرانی میں شاہی عیدگاہ کمیٹی اور شری کرشن جنم استھان سیوا سنگھ کے درمیان معاملے کے تصفیہ پر مبنی سمجھوتہ ہو چکا ہے۔ اس لیے، وہاں کوئی حقیقی تنازع نہیں ہے اور ہونا بھی نہیں چاہیے۔