نئی دہلی: وَقف جائیدادوں کی رجسٹریشن کے لیے شروع کیے گئے اُمّید پورٹل کا معاملہ سپریم کورٹ تک پہنچ گیا ہے۔ آل انڈیا مسلم پرسنل لا بورڈ کے وکیل نے فوری سماعت کی درخواست کرتے ہوئے کہا ہے کہ وقف بائے یوزر یعنی استعمال کی بنیاد پر تسلیم شدہ جائیدادوں کی رجسٹریشن کے لیے صرف چھ ماہ کا وقت دیا گیا ہے، جبکہ اس معاملے پر سپریم کورٹ میں فیصلہ پہلے ہی محفوظ ہے، اس لیے ایسے وقت میں حکومت کی جانب سے یہ قدم اٹھانا مناسب نہیں ہے۔

چیف جسٹس بی آر گَوَئی نے اس معاملے پر سماعت سے انکار کرتے ہوئے کہا کہ کسی کو بھی رجسٹریشن کرانے سے روکا نہیں جا رہا، لہٰذا فی الحال سماعت کی ضرورت نہیں ہے۔ چیف جسٹس نے کہا کہ "جب فیصلہ سنایا جائے گا، تب ان تمام پہلوؤں پر غور کیا جائے گا۔

مرکزی حکومت نے 6 جون کو تمام وقف جائیدادوں کی جیو ٹیگنگ (Geo-Tagging) کے بعد ایک ڈیجیٹل فہرست تیار کرنے کے لیے ایک نیا پورٹل "Integrated Waqf Management, Empowerment, Efficiency and Development (UMMEED)" لانچ کیا تھا۔

اس پورٹل پر پورے بھارت کی تمام رجسٹرڈ وقف جائیدادوں کی تفصیلات 6 ماہ کے اندر اپ لوڈ کرنا لازمی قرار دیا گیا ہے۔ 22 مئی کو چیف جسٹس بی آر گَوئی کی سربراہی میں سپریم کورٹ کی بینچ نے وقف سے متعلق تین اہم نکات پر عبوری حکم محفوظ کر لیا تھا۔ ان میں سے ایک نکتہ وقف (ترمیمی) ایکٹ 2025 سے متعلق ہے، جس میں عدالتوں، یوزر یا وصیت کے ذریعے وقف قرار دی گئی جائیدادوں کو غیر مطلع کرنے (ڈی-نوٹیفائی) کے اختیار سے متعلق دفعات شامل ہیں۔

جمعہ کے روز، ایک وکیل نے عدالت کو بتایا کہ حکومت کے پاس ایک پورٹل ہے جو کہ "وقف بائے یوزر" سمیت تمام وقف جائیدادوں کی لازمی رجسٹریشن کا مطالبہ کر رہا ہے۔ وکیل کا کہنا تھا کہ ہم نے ایک عبوری درخواست داخل کرنے کی کوشش کی لیکن رجسٹری نے یہ کہتے ہوئے انکار کر دیا کہ اس معاملے پر پہلے ہی فیصلہ محفوظ ہے۔ چیف جسٹس نے کہا، ہم نے اس پر فیصلہ محفوظ کر لیا ہے۔

وکیل نے مؤقف اپنایا کہ اصل مسئلہ وقت کا ہے، کیونکہ مرکز نے رجسٹریشن کے لیے صرف چھ ماہ کا وقت دیا ہے۔ اس پر چیف جسٹس نے کہا، آپ رجسٹریشن کروائیں... کوئی بھی آپ کو نہیں روک رہا۔" انہوں نے مزید کہا کہ اس پہلو پر بعد میں غور کیا جا سکتا ہے۔ عدالت نے وقف جائیدادوں کی نوٹیفکیشن منسوخ کرنے، ریاستی وقف بورڈز اور مرکزی وقف کونسل کی ساخت جیسے مختلف نکات پر بھی فیصلہ محفوظ کر لیا ہے۔

تیسرا اہم مسئلہ اس شق سے متعلق ہے، جس کے مطابق اگر ضلع کلکٹر یہ جانچ کر رہا ہو کہ کوئی جائیداد سرکاری ہے یا نہیں، تو ایسی صورت میں اس جائیداد کو وقف نہیں مانا جائے گا۔ مرکزی حکومت نے اس قانون کا پرزور دفاع کرتے ہوئے کہا ہے کہ وقف بذاتِ خود ایک "سیکولر تصور" (یعنی غیر مذہبی حکومتی ڈھانچے کے مطابق قابل قبول) ہے، اور اس کی آئینی حیثیت کو مدنظر رکھتے ہوئے اس پر روک نہیں لگائی جا سکتی۔