نئی دہلی: لال قلعہ میں ہوئے کار دھماکے کے معاملے میں این آئی اے کی جانچ سے یہ خوفناک انکشاف ہوا ہے کہ ملزمان لکھنؤ میں سلسلہ وار دہشت گردانہ حملوں کی سازش کر رہے تھے، جن میں اسمبلی اور دیگر اہم مقامات کو نشانہ بنایا جانا تھا جہاں لوگوں کی آمد و رفت زیادہ ہوتی ہے۔ سرکاری ذرائع نے پیر کے روز یہ جانکاری دی۔

انہوں نے کہا کہ دو اہم ملزمان ڈاکٹر مزمل شکیل اور ڈاکٹر شاہین سعید اس دہشت گردانہ سازش کے لیے ایک ’’منظم جاسوسی دورے‘‘ کے تحت 25 سے 30 اگست 2025 کے درمیان ہریانہ کے فرید آباد سے لکھنؤ گئے تھے۔ ذرائع کے مطابق، مزمل نے اتر پردیش میں حکومت کی علامت سمجھے جانے والے مختلف مقامات کی خفیہ نگرانی کی۔

اس نے اسمبلی، باپو بھون (سکریٹریٹ) اور امام باڑہ، لال باغ اور امین آباد جیسے بھیڑ بھاڑ والے علاقوں کی ریکی کی۔ ملزمان نے ان مقامات کو اپنے منصوبے کے لیے موزوں ہدف سمجھا۔ ایک ذریعے نے بتایا، ’’وہ ان عمارتوں کے احاطوں کے قریب دھماکہ خیز مواد سے بھری کار میں دھماکہ کرنے کی سازش رچ رہے تھے۔‘‘

قومی تحقیقاتی ایجنسی (این آئی اے) کی جانچ میں یہ بھی پتہ چلا ہے کہ ملزم مزمل نے اپنے فون کا استعمال لکھنؤ میں اُن کیمیائی دکانوں کو تلاش کرنے کے لیے کیا تھا جہاں ٹرائی ایسیٹون ٹرائی پیرو آکسائیڈ (ٹی اے ٹی پی) کی تیاری کے لیے ضروری دو بنیادی کیمیکل دستیاب تھے۔

ٹی اے ٹی پی ایک نہایت غیر مستحکم پیرو آکسائیڈ دھماکہ خیز مادہ ہے، جسے بین الاقوامی سطح پر ’’شیطان کی ماں‘‘ کے نام سے جانا جاتا ہے، اور جس کا استعمال گزشتہ سال 10 نومبر کو دہلی کے لال قلعہ میں ہوئے کار دھماکے میں کیا گیا تھا۔ ذرائع کے مطابق، شاہین نے مزمل کی ہدایت پر ان متعلقہ دکانوں کے نام اپنی تحریر میں لکھے تھے — یہ فہرست بعد میں این آئی اے نے اُس کے فون سے برآمد کی۔ دونوں ملزمان لکھنؤ میں شاہین کے ایک رشتہ دار کے گھر پر ٹھہرے تھے۔ ذرائع نے بتایا کہ شاہین کا آبائی گھر، جہاں اُن کے والد الگ رہتے ہیں، خانداری بازار، لال باغ میں واقع ہے۔

ذرائع کے مطابق، مزمل نے لکھنؤ کے رہنے والے اور شہر سے واقف ایک ’’گواہ‘‘ سے کہا تھا کہ وہ ان دکانوں پر جا کر ذاتی طور پر بڑی مقدار میں کیمیکل کی دستیابی کے بارے میں معلومات حاصل کرے۔ انہوں نے بتایا کہ مزمل نے اس گواہ کو اس لیے شامل کیا کیونکہ وہ مقامی باشندہ تھا اور بغیر شک پیدا کیے پوچھ گچھ کر سکتا تھا، جبکہ مزمل کو فوراً ایک بیرونی شخص کے طور پر پہچانا جا سکتا تھا۔

ذرائع کے مطابق، ملزمان نے شہر کے ایک سنسان علاقے میں ایسی جگہ بھی تلاش کی جہاں وہ خفیہ طور پر دھماکہ خیز مواد تیار کرنے کی سرگرمیاں انجام دے سکیں، بالکل اسی طرح جیسے وہ فرید آباد کے کھوڑی جمال پور میں واقع کرائے کے مکان میں کر رہے تھے۔

این آئی اے نے متعدد عینی شاہدین کے بیانات، تکنیکی تجزیے اور مالی لین دین کی جانچ کے ذریعے لکھنؤ سفر کے دوران پیش آئے واقعات کی مکمل کڑی جوڑ لی ہے۔ یہ انکشافات این آئی اے کی جانب سے 14 مئی کو داخل کی گئی سات ہزار پانچ سو صفحات پر مشتمل تفصیلی چارج شیٹ کا حصہ ہیں، جو گزشتہ سال 10 نومبر کو قومی دارالحکومت کو دہلا دینے والے شدید نوعیت کے گاڑی میں نصب دیسی ساختہ بم دھماکے کے سلسلے میں دائر کی گئی تھی۔