نئی دہلی: رئیل اسٹیٹ کنسلٹنسی ویسٹین کے مطابق مغربی ایشیا کے بحران کے باعث پیدا ہونے والے منفی رجحانات کے دوران بھارت کے رئیل اسٹیٹ شعبے میں ادارہ جاتی سرمایہ کاری جنوری تا مارچ 2026 کی سہ ماہی میں پچھلی دسمبر سہ ماہی کے مقابلے میں 62 فیصد کم ہو کر 1.41 ارب ڈالر رہ گئی۔

اس سے قبل اکتوبر تا دسمبر 2025 کی سہ ماہی میں یہ سرمایہ کاری 3.73 ارب ڈالر تھی۔ تاہم ویسٹین کے مطابق زیرِ جائزہ سہ ماہی میں گزشتہ سال کی اسی مدت کے مقابلے میں سرمایہ کاری میں 74 فیصد اضافہ ریکارڈ کیا گیا، جو عالمی منفی حالات کے باوجود بھارتی رئیل اسٹیٹ سیکٹر پر سرمایہ کاروں کے مضبوط اعتماد کی عکاسی کرتا ہے۔

رپورٹ کے مطابق 2026 کی پہلی سہ ماہی میں مجموعی سرمایہ کاری میں کمرشل (تجارتی) جائیدادوں کا غلبہ رہا، جس کا حصہ تقریباً 80 فیصد تھا۔ عالمی صلاحیت مراکز (GCC) کی مضبوط طلب اس کی بڑی وجہ بنی۔ اس دوران کمرشل پراپرٹیز میں سرمایہ کاری کم ہو کر 1.12 ارب ڈالر رہ گئی، جو پچھلی سہ ماہی میں 2.28 ارب ڈالر تھی۔ تاہم یہ گزشتہ سال جنوری تا مارچ کے 30.72 کروڑ ڈالر کے مقابلے میں تین گنا سے بھی زیادہ اضافہ ظاہر کرتی ہے۔

دوسری جانب رہائشی جائیدادوں میں سرمایہ کاری جنوری تا مارچ 2026 میں سہ ماہی بنیاد پر 53 فیصد اور سالانہ بنیاد پر 59 فیصد کم ہو کر 20.59 کروڑ ڈالر رہ گئی۔ ویسٹین کے چیف ایگزیکٹو آفیسر سرینواس راؤ نے کہا کہ گھریلو سرمایہ کاری میں تیزی کے باعث بھارت کا رئیل اسٹیٹ شعبہ بڑھتے ہوئے جغرافیائی سیاسی تناؤ اور وسیع معاشی چیلنجز کے باوجود لچک کا مظاہرہ کر رہا ہے۔