نئی دہلی: ہماچل پردیش کانگریس نے ایودھیا کے رام مندر میں مبینہ چندے کی چوری کے معاملے پر ہفتہ کے روز وزیر اعظم نریندر مودی پر شدید تنقید کرتے ہوئے مرکزی حکومت سے مطالبہ کیا ہے کہ اس معاملے کی سپریم کورٹ کی نگرانی میں آزادانہ عدالتی تحقیقات کرائی جائیں۔
ہماچل پردیش کانگریس کمیٹی (ایچ پی سی سی) نے شری رام جنم بھومی تیرتھ شیترا ٹرسٹ کے سابق جنرل سیکریٹری چمپت رائے اور سابق ٹرسٹی انیل مشرا کے خلاف فوری طور پر ایف آئی آر درج کرنے کا مطالبہ کیا۔ ریاستی کانگریس کا کہنا ہے کہ مبینہ "چندہ چوری" کے معاملے میں دونوں افراد کو گرفتار کیا جانا چاہیے۔ ایچ پی سی سی کے ایک ترجمان نے کہا کہ چمپت رائے اور انیل مشرا کے استعفے اس بات کی طرف اشارہ کرتے ہیں کہ معاملہ محض انتظامی کوتاہی کا نہیں بلکہ اس سے کہیں زیادہ سنگین ہے اور ایک بڑے گھوٹالے کی نشاندہی کرتا ہے۔
ترجمان نے کہا کہ ٹرسٹ کے خزانچی گووند دیو گری نے عوامی طور پر دعویٰ کیا ہے کہ انہیں اس معاملے کی کوئی اطلاع نہیں تھی، حالانکہ مالی نگرانی، شفافیت اور ٹرسٹ کے اثاثوں کے تحفظ کی بنیادی ذمہ داری انہی پر عائد ہوتی ہے۔ انہوں نے مزید کہا کہ میڈیا رپورٹس کے مطابق ٹرسٹ کے خصوصی مدعو رکن گوپال راؤ کو عہدے سے ہٹائے جانے اور ان کی حیثیت کے حوالے سے ابہام اور متضاد اطلاعات سامنے آئی ہیں۔
