ممبئی
رام چرن اور جانہوی کپور کی اسپورٹس ایکشن فلم ’’پیدی‘‘ کو ریلیز کے ابتدائی دنوں میں شائقین کی جانب سے زبردست پذیرائی ملی، لیکن اب فلم کی کمائی کی رفتار سست ہوتی دکھائی دے رہی ہے۔ ہفتے کے درمیانی دنوں (ویک ڈیز) کے آغاز کے ساتھ ہی فلم کے باکس آفس کلیکشن میں کمی دیکھی گئی ہے۔
چھٹے دن یعنی منگل کو فلم نے ہندوستان میں تقریباً 9.65 کروڑ روپے کا کاروبار کیا۔ اس کے ساتھ ہی فلم کا مجموعی انڈیا نیٹ کلیکشن 179.35 کروڑ روپے تک پہنچ گیا، جبکہ ہندوستان میں اس کا مجموعی (گراس) کلیکشن 213.24 کروڑ روپے ریکارڈ کیا گیا۔
فلم کی بیرونِ ملک کمائی بھی جاری ہے۔ چھٹے دن اوورسیز مارکیٹ سے فلم نے تقریباً ایک کروڑ روپے کا گراس کلیکشن حاصل کیا، جس کے بعد بیرونِ ملک اس کی مجموعی آمدنی 48 کروڑ روپے تک پہنچ گئی ہے۔مختلف تجارتی رپورٹس کے مطابق فلم کا عالمی سطح پر مجموعی گراس کلیکشن 261.23 کروڑ روپے ہو چکا ہے۔
تاہم کمائی کے اعداد و شمار کو لے کر کچھ ابہام بھی برقرار ہے۔ جہاں تجارتی ویب سائٹس کے مطابق فلم ابھی 300 کروڑ روپے کے ہندسے سے نیچے ہے، وہیں فلم کے پروڈیوسرز کا دعویٰ ہے کہ ’’پیدی‘‘ دنیا بھر میں 315 کروڑ روپے سے زائد کا کاروبار کر چکی ہے۔فلم سازوں نے سوشل میڈیا پر ایک نیا پوسٹر جاری کرتے ہوئے اس کامیابی کا اعلان بھی کیا ہے۔
دوسری جانب فلم کی آکیوپینسی (سنیما گھروں میں نشستوں کے بھرنے کی شرح) میں بھی کمی ریکارڈ کی گئی۔ منگل کو فلم کی مجموعی آکیوپینسی 26.51 فیصد رہی۔صبح کے شوز میں سب سے کم ہجوم دیکھنے میں آیا، جہاں آکیوپینسی صرف 17.38 فیصد رہی۔ دوپہر کے شوز میں یہ شرح 28.98 فیصد اور شام کے شوز میں 33.23 فیصد تک پہنچ گئی۔ رات کے شوز کے اعداد و شمار بعد میں جاری کیے جانے تھے۔
باکس آفس پر جہاں رام چرن کی اداکاری اور ایکشن مناظر کو بھرپور سراہا جا رہا ہے، وہیں جانہوی کپور کے کردار اور ان کے بعض مناظر کو لے کر سوشل میڈیا پر تنقید بھی دیکھنے کو ملی ہے۔اس کے باوجود فلم رواں سال کی سب سے زیادہ کمائی کرنے والی فلموں میں اپنی جگہ برقرار رکھے ہوئے ہے۔
اب سب کی نظریں آنے والے ہفتہ وار تعطیلات (ویک اینڈ) پر مرکوز ہیں۔ اگر ہفتہ اور اتوار کو ناظرین کی تعداد میں اضافہ ہوتا ہے تو فلم ایک بار پھر مضبوط کمائی کرنے میں کامیاب ہو سکتی ہے۔
