نئی دہلی : پہلگام دہشت گردی حملے میں ملوث تین دہشت گردوں کو مار گرانے کے لیے فوج اور سیکیورٹی فورسز کو مبارکباد دیتے ہوئے دفاعی وزیر راجناتھ سنگھ نے منگل کے روز راجیہ سبھا میں کہا کہ ہم جو کہتے ہیں، وہی کرتے ہیں۔

سنگھ نے ایوانِ بالا میں پہلگام میں دہشت گردانہ حملے کے جواب میں بھارت کے مضبوط، کامیاب اور فیصلہ کن آپریشن سندور پر خصوصی بحث کی شروعات کرتے ہوئے کہا کہ بھارت کی داخلی و خارجی سیکیورٹی کو یقینی بنانے کے لیے ملک کی دفاعی فورسز کی جو اہمیت رہی ہے، اس کی جتنی بھی ستائش کی جائے وہ کم ہے۔

انہوں نے کہا کہ وزیر داخلہ امت شاہ نے لوک سبھا میں اس بات کی تفصیل سے اطلاع دی ہے کہ پیر کو فوج، سی آر پی ایف اور جموں و کشمیر پولیس نے ایک مشترکہ آپریشن کیا تھا۔ انہوں نے کہا کہ اس آپریشن میں مارے گئے دہشت گردوں کے پاس سے برآمد ہونے والے ہتھیاروں کی فورنسک جانچ کی گئی۔ سنگھ نے کہا کہ تحقیقات میں یہ بات بالکل واضح ہو گئی کہ یہی وہ ہتھیار ہیں جن کا استعمال پہلگام دہشت گردانہ حملے میں کیا گیا تھا۔

دفاعی وزیر نے کہا، "ہم جو کہتے ہیں، وہ کرتے ہیں۔ یہی ہمارا کردار ہے۔ جموں و کشمیر کے پہلگام علاقے میں 22 اپریل کو دہشت گردوں نے 26 بے گناہ شہریوں کا بے دردی سے قتل کر دیا تھا۔ جموں و کشمیر کے موسم گرما کے دارالحکومت سری نگر کے نواحی جنگلات میں پیر کو فوج کے اعلیٰ پیرا کمانڈو نے پہلگام دہشت گردانہ حملے کے مرکزی منصوبہ ساز اور اس کے دو ساتھیوں کو مار گرایا تھا۔