جئے پور: راجستھان پولیس نے دو اعلیٰ تعلیم یافتہ سائبر ٹھگوں کو گرفتار کیا ہے جنہوں نے پورے ملک میں 4,000 سے زیادہ افراد کو تقریباً 1,000 کروڑ روپے کا چونا لگایا۔ گرفتار شدگان میں انوپ شریواستو شامل ہیں، جو اتر پردیش کے گورکھپور ضلع کے برئی پور کے رہائشی ہیں، جبکہ دوسرا ملزم روہت شرما ہے، جو دہلی کے ساگر پور تھانہ علاقہ کے رہائشی ہیں۔

دونوں انجینئر ہیں—انوپ نے نیشنل انسٹی ٹیوٹ آف ٹیکنالوجی ، بنگلور سے اور روہت نے این آئی ٹی دہلی سے انجینئرنگ کی ڈگری حاصل کی ہے۔ بھرت پور رینج کے آئی جی رہل پرکاش کے مطابق، ملزمان نے گاؤں والوں کے نام پر کمپنیاں قائم کر رکھی تھیں اور انہیں ماہانہ 20–25 ہزار روپے بطور ڈائریکٹر ادا کرتے تھے۔ فیلڈ ایجنٹس گاؤں سے دستاویزات جمع کر کے جعلی کمپنیاں رجسٹر کرواتے اور سارا ڈیٹا انوپ اور روہت کو بھجوایا جاتا تھا۔

یہ دونوں ملزم کرائے کے دفاتر لے کر اس ڈیٹا کی بنیاد پر ایپلیکیشن اور پیمنٹ سسٹم تیار کرتے۔ پولیس تفتیش کے دوران معلوم ہوا کہ مرکزی ملزم ششی کانت اور روہت دبے نے بنگلور میں ایک جعلی کمپنی کھولی۔ اس کے ذریعے آن لائن گیمز اور سرمایہ کاری کے بہانے پورے ملک میں ہزاروں افراد سے رقم ہتھیائی گئی۔

اب تک اس کمپنی کے خلاف تقریباً 4,000 شکایات درج ہیں، جن میں سے 3,000 شکایات فینو پیمنٹ اکاؤنٹس کے صارفین نے کی ہیں۔ 6 مارچ 2025 کو دھول پور کے رہنے والے ہری سنگھ نے سائبر تھانے میں 15 لاکھ روپے کی چوری کی شکایت درج کروائی۔ تحقیقات کے دوران دیگر علاقوں سے مزید شکایات سامنے آئیں، اور اس سائبر ٹھگی کے نیٹ ورک کی پرتوں پر کام کرتے ہوئے اب تک چھ افراد گرفتار کیے جا چکے ہیں۔

آئی جی رہل پراکش نے بتایا کہ یہ کیس صرف ریاستی سطح کا نہیں بلکہ قومی دھوکہ دہی سے منسلک ہے، اس لیے انہوں نے ڈی جی پی کو خط لکھ کر ای ڈی (انفورسمنٹ ڈائریکٹوریٹ) اور سی بی آئی سے تحقیقات کرانے کی سفارش کی ہے تاکہ پورا نیٹ ورک ختم کیا جا سکے۔ تفتیش کے مطابق یہ گروہ ششی کانت اور روہت دبے کے زیرِ انتظام تھا، جو اب بھی فرار ہیں۔ گرفتار ملزمان سے پوچھ گچھ جاری ہے اور پولیس مستقبل میں مزید بڑے انکشافات کی توقع رکھتی ہے۔