جے پور/ آواز دی وائس
راجستھان حکومت نے طلبہ میں عصری موضوعات کی سمجھ پیدا کرنے، مطالعے کی عادت کو مضبوط بنانے اور زبان کی مہارت بہتر کرنے کے مقصد سے تمام سرکاری اسکولوں میں روزانہ اخبار پڑھنا لازمی قرار دے دیا ہے۔ اسکول ایجوکیشن ڈیپارٹمنٹ نے اس سلسلے میں 31 دسمبر کو ایک حکم نامہ جاری کیا ہے۔
حکم کے مطابق ریاست کے تمام سرکاری اسکولوں میں طلبہ کے لیے روزانہ اخبار پڑھنا لازمی ہوگا۔ اس اقدام کے تحت اسکولوں کی دعائیہ اسمبلی میں روزانہ 10 منٹ قومی، بین الاقوامی اور کھیلوں کی اہم خبروں، نمایاں اداریوں اور بڑی خبروں کے اہم واقعات کا مطالعہ کیا جائے گا۔
اس کے ساتھ ہی طلبہ کی ذخیرۂ الفاظ کو مضبوط بنانے کے لیے روزانہ پانچ نئے الفاظ ان کے معانی کے ساتھ متعارف کرائے جائیں گے۔ اس ذمہ داری کے لیے جماعت ششم سے جماعت دوازدہم تک کے طلبہ کو شامل کیا جائے گا۔ حکم نامے میں کہا گیا ہے کہ ہائر سیکنڈری اسکولوں میں کم از کم دو اخبارات (ایک انگریزی اور ایک ہندی زبان کا) منگوائے جائیں، جبکہ ہر سرکاری اعلیٰ پرائمری اسکول میں ہندی زبان کے دو اخبارات منگوائے جائیں۔
اسی طرح انگریزی میڈیم سرکاری اسکولوں میں بھی کم از کم دو اخبارات (ایک انگریزی اور ایک ہندی زبان کا) منگوانے کی ہدایت دی گئی ہے اور دعائیہ اسمبلی کے دوران ایک انگریزی اور ایک ہندی قومی سطح کے اخبار کا مطالعہ کرایا جائے گا۔ محکمۂ تعلیم کا کہنا ہے کہ اس اقدام سے طلبہ میں خبروں کے تئیں دلچسپی بڑھے گی، عمومی معلومات میں اضافہ ہوگا اور زبان و اظہار کی صلاحیت میں مثبت بہتری آئے گی۔
محکمۂ تعلیم کے مطابق یہ قدم طلبہ کو باخبر، باشعور اور خوداعتماد شہری بنانے کی سمت ایک اہم کوشش ہے۔
